Bul týraly oblystyq kásipkerler palatasynyń dırektory Ǵalymbek Jaqsylyqov aıtty.
Prezıdenttiń ekonomıkany turaqtandyrýǵa qatysty bergen tapsyrmasyna sáıkes 20 sáýirde Úkimettiń qaýlysy shyqty. Atalmysh qaýly aıasynda kásipkerlik sýbektileri birqatar salyq túrlerinen bosatylyp, memlekettik qoldaýǵa ıe boldy.
Atap aıtqanda, mıkro, shaǵyn jáne orta kásipkerlik sýbektileri 29 ekonomıkalyq qyzmet túrleriniń jalpy jikteýishi boıynsha 1 sáýirden bastap 1 qazanǵa deıingi merzimge, al iri kásipkerlik sýbektileri 10 EQJJ (OKED) boıynsha 2020 jylǵy 1 sáýirden bastap 1 shildege deıingi merzimge tólem kózinen ustalatyn jeke tabys salyǵynan, jeke praktıkamen aınalysatyn tulǵa derbes tóleıtin jeke tabys salyǵynan, dara kásipkerdiń ózi úshin tóleıtinderin qospaǵanda, áleýmettik salyqtyń, mindetti zeınetaqy jarnalarynyń, mindetti kásiptik zeınetaqy jarnalarynyń, áleýmettik aýdarymdardyń, mindetti áleýmettik medısınalyq saqtandyrýǵa jarnalardan bosatyldy.
Sonymen qatar, 2019 jylǵy mindettemeler boıynsha salyq eseptiligi nysandaryn tapsyrý merzimi 2020 jylǵy 31 naýryzdan 2020 jylǵy 31 mamyrǵa aýystyryldy.
Osy rette, oblystaǵy shaǵyn jáne orta kásipkerlik sýbektileriniń barlyq salyqtar men bıýdjetke tólenetin basqa da mindetti tólemderi, sondaı-aq áleýmettik tólemder boıynsha tóleý merzimderi 2020 jyldyń 1 maýsymyna deıin uzartyldy.
Sonymen qatar, oblystyq kirister departamentiniń aqparaty boıynsha aımaqta búgingi kúnde 20 122 shaǵyn jáne orta kásipkerlik sýbektisi 2020 jyldyń 1 sáýiri men 1 qazany aralyǵynda birqatar salyq tólemderinen bosatyldy.