Búgin Soltústik Qazaqstan oblysynyń ákimi Qumar Aqsaqalov tikeleı efır arqyly halyqqa málimdeme jasap, óńirde karantın rejiminiń 28 sáýirden bastap jumsartylatynyn jarııa etti.
Erteńnen bastap jóndeý jáne qurylys kásiporyndary, sondaı-aq jol jóndeıtin jáne júk tasymaldaýshy kompanııalar, asfalt zaýyttary jumystaryn jalǵastyratyn bolady. Adam sanyna shaqqanda 45 myń jan jumysqa kirisedi. Halyqqa qyzmet kórsetý ortalyqtary kásipkerler úshin jumys isteıdi, al jeke tulǵalar úshin áli de onlaın túrinde qala beredi. Azyq-túlik dúkenderi men sýpermarketter jumystaryn tańǵy segizden keshki jetige deıin jalǵastyra alady. Buryn tańǵy saǵat 10.00 keshki 18.00-ge deıin ǵana bolatyn.
Qala turǵyndarynyń mazasy ketip júrgen másele - saıajaılarǵa barýdyń shektelgeni edi. Endi tańǵy saǵat besten keshki segizge deıin saıajaıǵa barýǵa ruqsat berilgen. Oǵan arnaıy avtobýstar aparatyn bolady, biraq avtobýstyń aýzy-murnynan shyǵa toltyrylýy qatań qadaǵalanady.
Aýrýhanalar da josparly jumystaryn jalǵastyratyn bolady. Dıagnostıkalyq keńester berý de jalǵasady. Advokattyq, konsýltasııalyq, sondaı-aq avtojýý, tehnıkalyq qyzmet kórsetý, hımııalyq tazartý sııaqty qyzmet kórsetý oryndary da iske qosylady.
Odan ári ákim soltústikqazaqstandyqtarǵa karantın barysynda kórsetilgen kómekter týraly da aıtyp ótti. Tabysynan aırylǵan barlyq 94 myń jan 42500 teńgelik kómek alǵan. Oǵan 4 mlrd teńge jumsalǵan. «Biz birgemiz» qory arqyly kómek alǵandar sany 11 myń adam. Bul shyǵynǵa 600 mln. teńge tólengen. Kommýnaldyq tólemderden azamattardyń 7 kategorııasy bosatylyp, oǵan 1 mlrd.teńge jumsalady.
Sóziniń sońynda Qumar Irgebaıuly oblys turǵyndaryna karantın kezindegi qatań rejimdi buljytpaı oryndaǵandary úshin alǵysyn aıtty. «Sonyń arqasynda sońǵy úsh aptada bizdiń oblysta birde bir adam naýqasqa ushyraǵan joq. Sáýir aıynyń basynda biz indetke tap bolǵandar sany boıynsha respýblıkada úshinshi orynda bolǵan edik. Sizderdiń karantın talaptaryn túsinistikpen oryndap, qatty saqtaǵandyqtaryńyzdyń arqasynda bizde indet kúsh almady. Qazir biz elimizdegi barlyq aımaqtyń arasynda 15-shi oryndamyz», dedi ol.
Sonymen birge ákim indettiń áli de aıyqpaǵanyn, sondyqtan saqtyq sharalaryn tómendetpeýdi, árkim ózi turatyn aýdandardaǵy dúkender men qyzmet oryndaryna ǵana barý kerektigin eskertti.
Soltústik Qazaqstan oblysy