Aqmola oblysynyń ákimi Ermek Marjyqpaevtyń tóraǵalyǵymen tótenshe jaǵdaıǵa baılanysty óńirlik jedel shtabtyń kezekti otyrysy ótkizip, Qazaqstan Respýblıkasynyń Prezıdenti Qasym-Jomart Toqaevtyń elimizdegi tótenshe jaǵdaıǵa baılanysty jasaǵan málimdemesine oraı óńirimizde atqarylýǵa tıisti sharalardy pysyqtady.
– Búgin El Prezıdenti Qasym-Jomart Toqaev koronovırýs pandemııasyna baılanysty jarııalanǵan karantın merzimin 11 mamyrǵa deıin uzartý týraly halyqqa málimdeme jasady. Onda aǵymdaǵy jaǵdaıǵa baǵa berilip, birqatar mindetter belgilendi. Memleket basshysy halyqtyń kirisin saqtaýǵa, áleýmettik jáne ekonomıkalyq turaqtylyqty qamtamasyz etýge baǵyttalǵan memlekettik qoldaý sharalaryn iske asyrýdyń barysyn baıandap berdi. Biz astana mańaıynda ornalasqan aýdandarda indetke shaldyqqan emdelýshilerge jiti kóńil bólýimiz kerek. Sonymen qatar, kóktemgi egis jumystaryn basty nazarda ustaýymyz qajet. Osyǵan oraı, tehnıkalyq qyzmet kórsetý stasııalary, – deı kelip, óńir basshysy aldaǵy ýaqytta atqarylatyn is-sharalarǵa keńinen toqtalyp ótti.
Sońǵy málimet boıynsha qazirgi tańda Aqmola oblysynda 927 adam medısınalyq baqylaýǵa alynyp, onyń 316-sy aýrýhanalarǵa jatqyzylǵan. Úı karantıninde 611 adam. Al, zerthanalyq tekseristen koronovırýs indeti rastalǵan 93 adam, onyń 31-i aýrýdan aıyǵyp shyqqandar.
Otyrys barysynda karantın kezeńiniń jeńildetilýine baılanysty birinshi kezekte ónerkásip kásiporyndary, qurylys, jol qurylysy jáne kólik kompanııalary, bankter jáne halyqqa qyzmet kórsetý ortalyqtary men tehnıkalyq qyzmet kórsetý ortalyqtary jumysqa kirisetini aıtyldy. Atap aıtqanda, óńirimizdegi 55 ónerkásiptik-ındýstrııalyq kásiporyn men asfalt-beton zaýyttary óz jumysyn jandandyrady. Alaıda, barlyq sanıtarlyq normalardy saqtap, jumys oryndarynda únemi dezınfeksııa júrgizý máselesi baqylaýda bolýy kerek ekendigi tapsyryldy. Qala men aýdan ákimderine karantın kezinde aýla alańdarynda tártipti qatań baqylaýda ustaý kerektigi de basa aıtyldy. Sonymen qatar, halyqty jumyspen qamtý jáne áleýmettik baǵdarlamalardy úılestirý basqarmasyna Uly Jeńistiń 75 jyldyǵyna oraı qajetti is-sharalardy júzege asyrý kerektigigi tapsyryldy.
Otyrys sońynda óńirdegi azyq-túlik qoryn, karantın tártibin saqtaý, kóktemgi egis naýqanyn shıratý máselelerine kóńil bólý kerektigi aıtylyp, tıisti basqarma basshylaryna naqty mindetter júkteldi.