Oblystyq teri-venerologııalyq aýrýhanasy tótenshe jaǵdaı merziminde provızorlyq stasıonar retinde qaıta jasaqtalǵan edi. Búgingi tańda nysanda 143 aqmolalyq indetin juqtyrý qaýpine baılanysty tekserýden ótti. Olardyń arasynda «Shapaǵat» arnaıy áleýmettik kómek kórsetý ortalyǵynyń 24 qamqorshysy bar.
«Shapaǵattyń» 200-den astam turǵynynyń ishinde 42 adamnan koronavırýs anyqtalǵan edi. Teri-venerologııalyq aýrýhanada jabdyqtalǵan provızorlyq ortalyq táýlik boıy medısınalyq baqylaý júrgizýde. Búgingi tańǵa deıin munda vırýs juqtyrǵan jandarmen baılanysta bolǵan 143 azamat tekserýden ótti. Qaýipti indet 10 adamnan anyqtalyp otyr. Dárigerler baqylaýyna alynǵan erekshe top «Shapaǵat» arnaıy áleýmettik kómek kórsetý ortalyǵynyń qamqorlyǵyndaǵy jandar. 10 sáýir kúni kelip túsken 24-iniń aýrýǵa shaldyqpaǵany rastaldy.
–Selınograd aýdanyndaǵy bul ortalyqtan indet oshaǵy anyqtalǵan bolatyn. Olardyń kópshiligi arnaıy medısınalyq kútimdi talap etetin jandar. Koronavırýsqa test eki ret tapsyryldy. Nátıje teris, ıaǵnı, aýrý anyqtalmady. Barlyq pasıentterdiń densaýlyq jaǵdaıy qalypty, aýrý belgileri joq,–deıdi provızorlyq stasıonardyń jetekshisi Jambyl Qabdiráshıtov.
Indet juqtyrý qaýpi bar azamattar temirjolshylar aýrýhanasy, qalalyq aýrýhana men teri-venerologııalyq aýrýhanasynda da medısınalyq tekserýden ótýde. Munda dárigerler ekstremaldy jaǵdaıda qyzmet atqaryp otyr deýge bolady. Aýysym ár eki apta saıyn, barlyq medısınalyq qyzmetkerler otbasynan, týǵan-týystarynan oqshaýlanyp, jeke jataqhanada qonystanǵan. Densaýlyǵy syr bergen, egde tartyp, kisi qolyna qarap qalǵan «shapaǵattyqtar» aq halatty abzal jandardyń eńbegine alǵys bildirýde.
Bul aýysymdaǵy 34 mamannyń ózderi de 14 kún saıyn tekserýden ótkiziledi. Qazir munda nebary 11 kúdikke ilingen adam qalǵan. Olardyń ınkýbasııalyq merzimi 30 sáýirde aıaqtalady.