Qaraǵandy oblysynyń ákimdiginde zoom platformasynda ótken onlaın-kezdesýdegi áńgime el Prezıdentiniń tapsyrmasy boıynsha qazaqstandyqtardyń tótenshe jaǵdaı kezeńinde alatyn áleýmettik qoldaýdyń qosymsha sharalary tóńireginde órbidi.
Oblystaǵy qala jáne aýdan ákimderiniń orynbasarlary, basqarma basshylary, sondaı-aq, múmkindigi shekteýli jandardyń quqyqtaryn qorǵaýmen aınalysatyn qoǵam ókilderi baılanysta bolǵan bul jıyndy oblys ákiminiń orynbasary Abzal Núkenov júrgizip otyrdy.
Jalpy, búgingi kúnde Qaraǵandy oblysynda 67 myńnan astam múgedek jan turady eken. Oblys ákiminiń orynbasary osy sanatqa jatatyn turǵyndardy áleýmettik qoldaýǵa jergilikti bıýdjetten 1,1 mıllıard teńge bólingenin málim etti. Iаǵnı, bul saladaǵy qarjylaı qol ushyn berý byltyrǵy jylmen salystyrǵanda 20%-ǵa artqan.
–Múmkindigi shekteýli jandardyń problemalaryn jete bilý úshin ózderińizben jıi kezedesetin bolamyz. Bul máselelerdiń sheshimin biz birigip tabýymyz kerek. Tótenshe jaǵdaı rejımine baılanysty memleket qoldaýyna qatysty kóptegen máseleler týyndady. Biz máselesi sheshilmegen bir de bir adamdy dalada qaldyrmaımyz, – dedi Abzal Núkenov.
Sáýir aıynyń ózinde 70 myńnan astam turǵynǵa azyq-túlik jáne turmystyq jıyntyqtar túrindegi kómekke qaejtti qarajat aýdarylǵan eken. «Osy aptanyń sońyna deıin kómek alýǵa tıisti adamdardyń jeke shottaryna barlyq tólemder túsýi tıis», dep atap ótti Abzal Núkenov.
Buǵan qosa, oblysta 100 myńnan astam adam karantın kezinde kommýnaldyq qyzmet shyǵyndaryn óteý tizimine engizilgen. Olardyń qatarynda I, II jáne III toptaǵy múgedekter men múgedek balalardy asyrap otyrǵan otbasylar da bar.
Sonymen qatar Abzal Núkenov búgingi kúnde Qaraǵandy oblysynyń 250 myń turǵyny 42 500 teńge kóleminde áleýmettik tólem alǵanyn málim etti. Olardyń arasynda múmkindigi shekteýli jandar da bar.
Onlaın-kedesý barysynda ınvataksı, karantın kezindegi ymdaý tili mamandarynyń qyzmetteri boıynsha da suraqtar qoıyldy. Oblys ákiminiń orynbasary bul máseleler boıynsha da tıisti sharalar qabyldanatynyn aıtty.
Múmkindigi shekteýli jandarǵa óte qajet qural – múgedekter arbasy týraly oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Ásem Júnispekova aıtyp berdi. Búginde bul quraldardy satyp alýǵa konkýrs ótken eken. Endi arbashalardy jetkizý aldymyzdaǵy maýsym aıynan bastalady. Tehnıkalyq jáne tıfloquraldar mamyr-maýsym aılarynda túsetin kórinedi.
Qaraǵandy oblysy