Tótenshe jaǵdaı jarııalanǵan ýaqyttan beri Nur Otan partııasy Túrkistan oblystyq fılıaly qoǵamdyq qabyldaý bólmelerine habarlasýshylar sany eselep artqan. Mysaly, 16 naýryzdan 27 sáýirge deıingi aralyqta 4457 aryz-ótinish túsken. Onyń ishinde «Facebook» áleýmettik jelisi arqyly – 418, «Instagram» arqyly – 812, «WhatsApp» jelisi arqyly –1042, telefon qońyraýlary arqyly 2185 ótinish pen aryz kelgen. Olardyń 3071-i oń sheshilip, 1327-sine zań aıasynda keńes berilse, 59 ótinish qaralý ústinde.
Taldaý kórsetkendeı, tótenshe jaǵdaı kezinde bir aıda ótinishter 3 esege artqan. О́tinishterdiń basym bóligi «Biz birgemiz!» aksııasy aıasynda azyq-túlikpen kómek kórsetý, «Birgemiz» qoǵamdyq qorynan berilip jatqan 50 myń teńge, memleket taǵaıyndaǵan 42500 teńge járdemaqy boıynsha túsken. Sonymen birge medısınalyq betperdeler men dári-dármekterdiń qoljetimdiligi men qunyna jáne memlekettik organdardyń qyzmetine qatysty da ótinishter men suraqtar qabyldanǵan. Tótenshe jaǵdaıǵa baılanysty partııanyń qoǵamdyq qabyldaý bólmeleriniń jumysy onlaın rejımde júrgizilip keledi. Bul baǵytta óńirde jumys júıeli jolǵa qoıylǵan.
Turǵyndarǵa partııa fılıaldary qoǵamdyq qabyldaý bólmeleriniń senim telefondary men barlyq áleýmettik jelileri boıynsha aqparat jarııalanǵan. Onlaın rejıminde jumys kúsheıtilgen. Máselesi nazarǵa alynǵan turǵyndar tarapynan da jyly pikirler aıtylýda. Turǵyndardyń talap-tilegin tikeleı tyńdaý úshin partııa fılıaly tóraǵasynyń birinshi orynbasary B.Tájibaev áleýmettik jelilerde eki ret qabyldaý ótkizdi. Áleýmettik salaǵa jaýapty basshylar da turǵyndar ótinishi men saýaldaryna jaýap berýde.
Túrkistan oblysy