Memleket basshysynyń tapsyrmasy boıynsha Nur-Sultan qalasynda tótenshe jaǵdaı kezinde tabysyn joǵaltqan azamattarǵa áleýmettik kómek kórsetý jalǵasýda.
30 sáýirdegi jaǵdaı boıynsha, 42,5 myń teńge áleýmettik tólemdi 284 myńnan astam qala turǵyny aldy – bul 12 mıllıard teńgeni quraıdy. Sonymen qatar Nur-Sultanda «Biz birgemiz» aksııasy ekinshi kezeńinde 28 073 adam 50 myń teńge kóleminde áleýmettik kómek aldy. Atap aıtqanda, kómek azamattardyń jeti sanaty boıynsha kórsetildi. Olar AÁK alatyn az qamtylǵan otbasylar, eń tómengi zeınetaqy alatyn zeınetkerler, birinshi nemese ekinshi toptaǵy múgedektigi bar zeınetkerler, jetim balalar, soǵys ardagerleri jáne olarǵa teńestirilgen azamattar, sondaı-aq qaraýynda múgedek balalary bar otbasylar jáne tyl eńbekkerleri.
«Biz birgemiz» aksııasy aıasyndaǵy kómektiń birinshi kezeńinde 14 478 otbasyǵa 50 000 teńgeden qarjylaı kómek kórsetildi. Nur-Sultan qalasynyń 30,4 myńnan astam turǵyny halyqtyń osal toptaryna áleýmettik kómek kórsetý aıasynda azyq-túlik jáne turmystyq jıyntyq satyp alýǵa qosymsha aqshalaı (4 AEK-10 604 teńge) kómek aldy. Bul kómekpen barlyǵy 40 myńnan astam adam qamtylady.
«Nur-Sultanda AÁK alatyn otbasylardyń 1 jastan 6 jasqa deıingi balalaryna azyq-túlik jıyntyǵy men turmystyq hımııa taýarlary berildi. Kepildendirilgen áleýmettik paketter keste boıynsha beriledi. Jalpy kepildendirilgen áleýmettik paketpen 2,7 myńnan astam otbasy, onyń ishinde 4,6 myń balany qamtyldy», – dep habarlaıdy qalalyq jumyspen qamtý jáne áleýmettik baǵdarlamalar basqarmasy.
Esterińizge sala keteıik, naýryz aıynyń sońynan búginge deıin halyqtyń áleýmettik osal toptaryna bir jarym mıllıonǵa jýyq maska taratyldy. Ár túrli áleýmettik sharalarǵa qalalyq shtabtan 500 erikti tartyldy.