О́zbekstan Respýblıkasynyń Syrdarııa oblysynda ornalasqan «Sardoba» sý qoımasy dambasynyń buzylýy Túrkistan oblysy óńiriniń turǵyndaryna da zalalyn tıgizýde.
Búgin, ıaǵnı 2 mamyr, saǵat tańǵy 4.30 kezinde Maqtaaral aýdanynyń shekarasynda ótkizý qýaty sekýndyna 120 tekshe metr bolatyn «Sentralnyı golodnostepnyı Kollektor (SGK)» arnasynda sý aǵyny oryn alyp, Jeńis, Jańa Turmys aýyldarynda sý deńgeıi kóterildi. Oblystyq mańyzy bar Myrzakent-Jeńis-Jańa Turmys avomobıl jolyn sý alyp ketýi saldarynan kólikter júre almaýda. Qazirgi tańda apatty-qutqarý jumystary júrgizilýde.
Sondaı-aq Myrzakent, Ferdoýsı, Atakent kentine qarasty Jantaqsaı eldi mekenderi turǵyndaryn evakýasııalaý máselesi qarastyrylýda. Aıta ketelik, Myrzakent pen Ataken eldi mekenderiniń ara qashyqtyǵy - 35 shaqyrym. Myrzakent eldi mekeninde 2848 úı, 14 532 adam, Ferdoýsı eldi mekeninde 314 úı, 2377 adam turady. Al Jantaqsaı eldi mekeninde 95 úı, 700 turǵyn bar.
Apatty-qutqarý jumystaryna Túrkistan oblysy Tótenshe jaǵdaı departamenti jeke quramynan 138 adam, 8 tehnıka, Shymkent qalasy «OSO» MM 5 adam, 2 dana qaıyq, 1 tehnıka, Shymkent qalasy TJD-nen 2 dana vahtalyq avtobýsy, jeke quramnan 12 maman, 4 dana MP-100 motopompasy, 2 úrlenbeli qaıyq, 10 L-1 jıyntyǵy (súńgýirler kıimi) jumyldyrylǵan. Sondaı-aq Ulttyq gvardııanyń 6506 bólimshesinen 300 adam men tıisti tehnıkalar, aýdandyq polısııa bóliminiń 7 tehnıkasy men 70 qyzmetkeri, jergilikti atqarýshy organnan 40 qyzmetker, 5 tehnıka tartyldy.
О́zbekstan Respýblıkasy TJM shuǵyl málimetine sáıkes, 1 mamyr 20:15 shamasynda «Sardoba» sý qoımasy Qazaqstan Respýblıkasy aýmaǵyna sý aǵyzýdy toqtatqan. Maqtaaral aýdany ákimdigi shuǵyl shtab quryp, tıisti jumystardy atqarýda. Eńbekshi aýyldyq okrýgine qarasty Jańa turmys eldi mekeni, Jańa jol aýyldyq okrýgine qarasty Jeńis, Nurly jol eldi mekenderine sý basý qaýpi týyndap, turǵyndardy qaýipsiz jerge evakýsııalaý úshin aýdan ortalyǵy Myrzakent kentinde ornalasqan 4 mektepte barlyǵy 2200 ryn daıyndaldy.
Maqtaaral aýdanynyń ákimi, aýdandyq tótenshe jaǵdaı shtabynyń tóraǵasy Baqyt Asanovtyń tóraǵalyǵymen 2-mamyr kúni túngi 00:00-de shtab múshelerimen arnaıy jıyn ótip, tótenshe jaǵdaı jarııalaýǵa tapsyrma berildi. Qazirgi tańda Jańajol aýyldyq okrýgine qarasty Jeńis eldi mekeniniń turǵyndaryn (1922 turǵyn) qaýipsiz jerge jappaı kóshirý júrgizilýde.
Aıta keteıik, mamandardyń aıtýynsha, joǵaryda atalǵan 3 eldi mekennen basqa kentter men eldi mekenderge qaýip tónip turǵan joq. Sondaı-aq Maqtaaralǵa kórshi Jetisaı aýdany ákiminiń málimdeýinshe, aýdanǵa keler qaýip - qater joq.