Aqtóbe qalasynda budan eki jyl buryn «Anaǵa taǵzym» atty arnaıy ortalyq qurylyp, sáni men sáýleti kelisken syńǵyrlaǵan sý jańa ǵımaratqa ornalasty.
Sol ýaqyttan beri óńirler arasynda balamasy joq áleýmettik qurylym analar men qyz-kelinshekterge qatysty tolǵaǵy jetken máselelerdi sheshý men retteýge úles qosyp keledi. Taıaýda munda taǵy bir jaǵymdy jańalyq boldy. Iаǵnı atalǵan ǵımarat janynan «Baqytty otbasy» ortalyǵy ashylyp qyzmet kórsete bastady.
– Muny buǵan deıin jumys istep kelgen otbasyn saqtaý kabınetiniń jańa sapalyq deńgeıge kóterilýiniń basty kórinisi dep baǵalaýǵa bolady. Maqsat – otbasy qundylyǵyn dáripteýge keńinen jol ashý, – deıdi bul jóninde Nur Otan partııasynyń Aqtóbe oblystyq fılıaly tóraǵasynyń birinshi orynbasary Erbol Danaǵulov.
Jańadan ashylǵan ortalyqta kásibı medıatorlar jáne zańgerler men psıhologter turǵyndarǵa tıisti kómek berýge bir kisideı jumylǵan. Sondaı-aq áleýmettik-turmystyq máselelerdiń sheshimin birlesip izdestirý joldary da qarastyrylǵan. Bul úshin óńirdegi memlekettik organdar basshylary men máslıhat depýtattarynyń turǵyndardy turaqty qabyldaý tártipteri belgilengen.
Otbasynyń shaıqalmaýy, ata-analardyń ul-qyzdaryna úlgi-ónege kórsete bilýi otbasy músheleri arasyndaǵy tatýlyq pen túsinistik, ózara jan jylýy baqytty otbasy atanýǵa aparatyn joldyń basy. Áıtse de ómirde shyny aıaq syldyrlap qalatyn jaıttar da kezdesedi. Túkke turmaıtyn kıkiljińge bola erli-zaıyptylardyń ajyrasý derekteri de oryn alyp júrgeni málim. Baqytty otbasy osy máselelerge baılanysty júrgiziletin jumystardyń júrekterge meılinshe jaqyn bolýyn maqsat tutyp otyr. Atalǵan ortalyqta qyzmet etip júrgen kásibı medıator, ómirden kórgeni men kóńilge túıgeni mol jan Bıbigúl Ábdishúkirqyzy bul baǵyttaǵy túıtkilder men betpe-bet kelip júrgenderi jóninde bylaısha áńgimelep berdi.
– Biz Aqtóbe qalalyq sotyna ajyrasýǵa ótinish bergen erli-zaıyptylarmen ashyq áńgime júrgizemiz. Ekeýiniń ortasyna túsý óte názik ári sary maıdan qyl sýyrǵandaı kúrdeli másele ekeni málim. Soǵan qaramastan olarmen ortaq til tabysýǵa umtylyp kelemiz. Onyń nátıjesi jaman emes. Ajyrasýǵa aryz bergenderdiń úshten ekisi qaıtadan tatýlasyp, ortaq mámilege kelgeni bárimiz úshin qýanysh.
Taǵy bir aıtary, ajyrasýǵa bel býǵan jas otbasylardyń alpys paıyzy ata-enesimen birge turǵysy kelmeıtinder eken. Sondaı-aq jıyrma paıyz kelinshekter men áıelder turmystary men tabystary táýir bola tursa da ózderine er-azamatpen quqymyz teń dep olarǵa kókirek kórsetýdi ádetke aınaldyrypty.
AQTО́BE