Úkimet 2026 jylǵy 15 naýryzda respýblıkalyq referendýmda qabyldanǵan Qazaqstan Respýblıkasynyń Konstıtýsııasyn túsindirý jónindegi is-sharalar josparyn bekitti.
Tıisti qaýlyǵa Premer-mınıstr Oljas Bektenov qol qoıdy. Qujat Konstıtýsııanyń negizgi erejelerin túsindirý boıynsha júıeli jumysty uıymdastyrýǵa, azamattardyń quqyqtyq saýatyn arttyrý, negizgi Zań erejelerinen týyndaıtyn zańnamalyq sharalardy júzege asyrýǵa baǵyttalǵan.
Jospar úsh baǵyt boıynsha 36 is-sharany qamtıdy: uıymdastyrý sharalary, aqparattyq-túsindirý jumystary jáne Konstıtýsııanyń oryndalýyn quqyqtyq qamtamasyz etý.
Atap aıtqanda, uıymdastyrýshylyq is-sharalar aıasynda Konstıtýsııa mátinin basyp shyǵarý men taratý, onyń ishinde múgedektigi bar adamdarǵa beıimdelgen formatta ázirleý kózdeldi. Konstıtýsııa elektrondy platformalarda ornalastyrylady. Sondaı-aq ǵylymı-saraptamalyq qamtamasyz etý, aqparattyq-kórneki bezendirý, taqyryptyq materıaldar shyǵarý, kórme jáne aǵartýshylyq jobalaryn júzege asyrý josparlanǵan.
Halyqtyń quqyqtyq mádenıeti men quqyqtyq saýatyn qalyptastyrý isine kóńil bólindi. Josparǵa oqytý semınarlary men bilim berý is-sharalaryn ótkizý, mektep pen JOO baǵdarlamalarynyń mazmunyn jańartý, «Quqyq negizderi» jáne «Zań men tártip» kýrstaryn, ádistemelik materıaldar men balalar basylymdaryn ázirleý kiredi.
Aqparattyq-túsindirý jumysy aıasynda birqatar is-shara men keshendi medıa-jospar ázirlendi.
Konstıtýsııanyń júzege asyrylýyn quqyqtyq qamtamasyz etý jónindegi is-sharalar, onyń ishinde zańnamalyq sharalardy iske asyrý, qoldanystaǵy zańnamany taldaý, Negizgi zańnyń normalaryn eskere otyryp, strategııalar men tujyrymdamalardy ózektendirý sharalary bólek qarastyrylǵan.
Jalpy alǵanda, jospar Konstıtýsııa normalaryn halyq arasynda keńinen túsindirýdi ári elimizdiń Negizgi zań erejeleriniń tolyqqandy júzege asyrylýyn qamtamasyz etedi.