Syr óńirinde júgerini tereń óńdeıtin jańa óndiris ornynyń irgetasy qalandy. Joba agroónerkásip keshenin damytý jáne óńdeý salasyn keńeıtý baǵytyndaǵy mańyzdy qadamdardyń biri sanalady.
Atalǵan bastama byltyr Qyzylorda oblysynan barǵan delegasııanyń Jetisý óńirine jumys sapary barysynda qolǵa alynǵan edi. Sapar aıasynda aýyl sharýashylyǵy qurylymdarynyń ókilderi elimizdegi iri óndiris oryndarynyń biri – «Jarkent krahmal-sirne zaýytynyń» jumysymen tanysyp, tájirıbe almasty. Kelissóz nátıjesinde Syrdarııa aýdanynda júgeri daqylyn tereń óńdeıtin zaýyt salý jóninde naqty ýaǵdalastyqqa qol jetkizildi.
Jańa óndiris orny jylyna 150 myń tonna júgeri daqylyn óńdeıdi. Quny 40 mlrd teńge bolatyn zaýyt zamanaýı talaptarǵa saı joǵary sapaly tehnologııalarmen jabdyqtalyp, 550 adamǵa turaqty jumys tabylady.
Bıyldan bastap óńirde júgeri egisiniń kólemi 15 myń gektarǵa jetpek. О́ńirdiń agrarlyq áleýetin jańa deńgeıge kóterýge múmkindik beretin ónim alqaptary jyl saıyn artyp, tereń óńdeýge baǵyttalǵan júgeri óndirisin qolǵa alǵan sharýalarǵa memleket tarapynan qarjylaı kómek kórsetiledi.
Keıingi 3 jylda memleket tarapynan agrarlyq salany qoldaýǵa 92,4 mlrd teńge bólingen. Bıyl bul maqsatqa 34 mlrd 800 mln teńge qarastyrylyp, sharýashylyqtar esebinen 58 mlrd teńgeden astam ınvestısııa tartyldy.
Byltyr aýyl sharýashylyǵynda 11 mlrd 600 mln teńgeniń 16 ınvestısııalyq jobasy iske qosylyp, salanyń negizgi qoryna tartylǵan ınvestısııa kólemi 74 paıyzǵa artqan.
2026–2028 jyldarǵa arnalǵan ınvestısııalyq jobalardyń jol kartasy ázirlenip, oǵan 138 mlrd 200 mln teńgeniń 17 jobasy engizilipti. Júıeli jumystyń arqasynda jalpy ónim kólemi jyl saıyn ósip keledi.
О́tken jyly bul kórsetkish 233 mlrd 450 mln teńge bolsa, bıyl 240 mlrd 400 mln teńgege jetkizý josparlanǵan.
Qyzylorda oblysy