Búgin Qazaqstan men О́zbekstan úkimettik delegasııalarynyń О́zbekstannyń Syrdarııa aýdany men Qazaqstannyń Túrkistan oblysynyń aýmaqtarynyń bir bóliginiń sý basýyna ákelgen Sardoba sý qoımasyndaǵy tótenshe jaǵdaı saldaryn joıý jónindegi máselelerdi birlesip sheshý jónindegi kezdesýi ótti. Bul týraly Premer-Mınıstrdiń baspasóz qyzmeti habarlady.
Premer-Mınıstrdiń orynbasary R. Sklıardyń jetekshiligimen Qazaqstan Respýblıkasynyń delegasııasynyń quramyna Túrkistan oblysynyń ákimi О́. Shókeev, Qazaqstannyń Ekologııa, geologııa jáne tabıǵı resýrstar mınıstri M. Myrzaǵalıev pen Qazaqstannyń О́zbekstandaǵy elshisi D. Satybaldy kirdi.
Premer-Mınıstrdiń orynbasary S. Ýmýrzakov bastaǵan О́zbekstan Respýblıkasynyń delegasııasynyń quramyna О́R sý sharýashylyǵy mınıstri Sh. Hamraev pen Syrdarııa oblysynyń hokımi G. Mırzaev kirdi.
Úkimettik delegasııalar eki eldiń sý astynda qalǵan aýmaqtaryn tikushaqpen ushyp aralap shyqty, onyń barysynda taraptar Sardoba sý qoımasynyń dambasynan sý aǵynynyń tolyq toqtaǵanyna kóz jetkizdi.
Osy kúni kelissóz júrgizildi, onda taraptar oryn alǵan jaǵdaıdy talqylap, tótenshe jaǵdaıdyń saldaryn joıý boıynsha birlesken jumysty atqarýǵa kelisti.
Qazirgi tańda ózbek tarapy О́zbekstan aýmaǵynda bógettiń buzylýynyń saldaryn joıý jumystaryn júrgizýmen qatar, Túrkistan oblysyna, eń aldymen Fırdoýsı jáne О́rgebas aýyldaryna, sý basý saldaryn joıýǵa járdemdesý úshin 100-den astam tehnıka men mamandardy jibergen.
Kelissóz kezinde taraptar Sardoba sý qoımasyn qalpyna keltirý máselesi jóninde ózara kelisilgen jumystardy uıymdastyrý týraly kelisimge qol jetkizdi.
Kezdesý sońynda taraptar eki el arasyndaǵy dástúrli dostyq pen strategııalyq áriptestik sabaqtastyǵyndaǵy tyǵyz yntymaqtastyǵyn odan ári jalǵastyrýǵa nıettestigin bildirdi.