Nur Otan partııasynyń «Biz birgemiz!» aksııasy aıasynda Almaty oblysynan Maqtaaral aýdanyna 15 júk kóligine tıelgen 100 tonna azyq-túlik pen 160 tonna qurylys materıaldary kelip jetti.
Kómek kerýenindegi azyq-túlik pen gıgıenalyq zattar oblystyq shtabtyń Atakenttegi ortalyqtandyrylǵan qoımasyna, qurylys materıaldary Myrzakent kentindegi qurylys bazasyna túsirildi. Kómek kerýenin Almaty oblystyq jastar isi jónindegi basqarma basshysy Jomart Qaratas pen Nur Otan partııasynyń Almaty oblystyq fılıaly tóraǵasynyń birinshi orynbasary Janbolat Jórgenbaev bastap kelipti. Jomart Qaratastyń aıtýynsha, gýmanıtarlyq kómekpen birge taldyqorǵandyq 20 erikti jas ere kelgen. Olar aldaǵy ýaqytta Maqtaaral aýdanyndaǵy qurylys jumystaryna atsalysyp, túrkistandyq eriktilermen qoıan-qoltyq eńbek etetin bolady. «Maqtaaral aýdanynda oryn alǵan apat barsha qazaqstandyqtardy alańdatyp otyrǵany belgili. Osy oraıda aýdan halqyna el bolyp qoldaý kórsetip, memleketimizdiń túkpir-túkpirinen kómekter toqtaýsyz kelip jatyr. Búgin biz de oblys ákimi Amandyq Ǵabbasuly Batalovtyń bastamasymen Jetisý jurtshylyǵynyń amanatyn arqalap kelip otyrmyz. Bul kómek kerýenine kıeli óńirimizdiń kásipkerleri men demeýshileri jáne eriktiler óz úlesterin qosty", deıdi Janbolat Jórgenbaev.
Jetisý jurtshylyǵy jibergen 260 tonna júktiń ishinde 18 tonna un, 7 tonna kúrish, 3 630 lıtr suıyq maı, 6 tonna makaron, jarty tonna perlovka, 4,5 tonna qant, 548 dana shaı, 6 myń sharshy metr qurylys aǵashy, 100 tonna sement, 20 myń dana kirpish, 90 qap qurylys qospasy, 15 tonna gıpsokarton, 10 tonna qurǵaq qospa bar.
Túrkistan oblysy