Maqtaaral aýdanynda sý basqan Nurlyjol, Jańaturmys, Fırdoýsı, О́rgebas, Dostyq jáne Jeńis aýyldarynan jalpy 8 455 tekshe metr sý shyǵarylǵan.
Nátıjesinde aýyldardaǵy sý deńgeıi 3-4 santımetrge tómendedi. Tórt aýylda sý deńgeıi 44-50 santımetr, al О́rgebas aýylynda 10 santımetr deńgeıinde qalyp otyr.
Oblys ákiminiń orynbasary Sáken Qalqamanov bastaǵan mamandar Maqtaaral aýdanyndaǵy sý basqan aımaqtardaǵy zalalsyzdandyrý jáne qaýipsizdikti qamtamasyz etý jumystaryn qatań baqylaýǵa alǵan. Mamandar Fırdoýsı aýylyndaǵy jalpy orta mekteptiń jertólesi men mektep aýlasyn sýdan tazartý jumystaryn tekserip, О́rgebas jáne Jeńis aýyldaryndaǵy egistik alqaptardy sýdan bosatý jumystaryn talqylady.
Aıta ketelik, sý basqan aýyldarda avarııalyq-qutqarý jumystaryn júrgizý úshin 1626 adam, 17 qaıyq, 324 birlik tehnıka, 217 dana sý sorǵy jumyldyrylǵan.
Túrkistan oblysy