Túrkistan oblysyna arnaıy jumys saparymen kelgen Senat depýtattary Álı Bektaev, Álimjan Qurtaev jáne Májilis depýtaty Erjan Qudaıbergen Maqtaaral aýdanyndaǵy topan sýdan zardap shekken aýyldardy aralap, jergilikti turǵyndardyń jaǵdaıymen tanysty.
Senatorlar aldymen tótenshe jaǵdaıǵa baılanysty oblystyq shtabtyń ortalyqtandyrylǵan qoımasynda boldy. Jalpy búginge deıin qoımaǵa elimizdiń barlyq oblystarynan 620 tonnadan astam taýar kelip túsken. Onyń 220 tonnaǵa jýyǵy evakýasııalyq pýnktterde ýaqytsha ornalasqan azamattarǵa úlestirilip berilgen. «Aýyldaryn topan sý shaıyp, qıyndyqqa dýshar bolǵan maqtaaraldyqtardyń máselesi bizdi de qatty tolǵandyrdy. Desek te, Elbasymyz, Prezıdentimiz, Nur Otan partııasy, oblys ákimdigi jáne búkil oblystar barynsha kómek qolyn sozyp, Myrzashól halqymen birge ekenin tanytyp jatyr. Aldaǵy 1-2 aıda jańa úıler boı kóterip, egin, mal shyǵyndary tolyq tólenip, bul qıyndyqtardy da eńseretinimizge senimdimiz. Senat depýtattary retinde maqtaaraldyqtarǵa qashanda qoldaý bildirýge biz de daıynbyz», deıdi Álı Bektaev.
Depýtattar sý basyp qalǵan О́rgebas jáne Fırdoýsı aýyldaryna baryp, turǵyndardyń talap-tilekterin tyńdady. Qazirgi tańda arnaıy mamandardyń kómegimen aýyldardy sýdan tazartý jumystary jalǵasýda. Apattyń zardaptaryn joıýǵa Nur-Sultan, Shymkent qalalary men Almaty, Jambyl, Qaraǵandy oblystaryndaǵy Tótenshe jaǵdaı departamentterinen qosymsha kúsh tartylǵan. Bul jumystarǵa jalpy 37 tehnıka, 102 sorǵysh, 1494 maman jumyldyrylǵan. Búginge deıin aýyldardy basyp qalǵan sýdyń 10 myń tonnasy nasos arqyly qaýipsiz aımaqqa shyǵarylǵan. Atakent kenti men Maqtaaral aýyldyq okrýgindegi №14 kolledji men №42 jalpy orta mektebindegi evakýasııalyq beketterinde ýaqytsha ornalasqan turǵyndar depýtattarmen kezdesýde osyndaı qıyn-qystaý kezeńde bar kómegin aıamaǵan Úkimet pen oblys basshylyǵyna jáne barsha qazaqstandyqtarǵa shynaıy alǵystaryn bildirdi.
Sondaı-aq, halyq qalaýlylary jańadan boı kóterip jatqan eldi mekende bolyp, qurylys jumystarymen tanysty. Topan sýda qalǵan Jańaturmys, Jeńis, Dostyq aýyldaryn basqa jerge qonystandyrý úshin Myrzakent kentinen jalpy 160 gektar aýmaqqa 505 úı salynýda.