Volonter jastardy qoldaý maqsatynda «Jas Ulan» biryńǵaı balalar men jasóspirimder uıymy» RQB, Aqparat jáne qoǵamdyq damý mınıstrligi, «Azamattyq bastamalardy qoldaý ortalyǵy» KeAQ qoldaýymen «Birgemiz: Taza Alem», «Birgemiz: Asyl mura» jalpyulttyq jobalary shaǵyn granttar baıqaýyn jarııalady.
Ekologııaǵa jáne tarıhı-mádenı muralarǵa qatysty jobalardy iske asyrýǵa múmkindik berý, jobalardy iske asyrýǵa azamattardy kóptep qatystyrýǵa negizdelgen baıqaý birneshe baǵyt boıynsha júrgiziledi.
Arheologııalyq izdeý jumystaryn júrgizý, qalpyna keltirý (restavrasııa) jumystaryn júrgizý, tarıhı-mádenı nysandarda monıtorıng júrgizý, tarıhı-mádenı oryndarǵa volonter-gıdter daıarlaý, tarıhı-mádenı oryndardy nasıhattaýǵa volonterlerdi tartý, materıaldyq emes mádenı murany saqtaý boıynsha jobalarǵa volonterlerdi tartý boıynsha jumys júrgizetin jastardyń grantty utyp alýǵa múmkindikteri bar.
Grantty 136 jasqa berý josparlanǵan. 23 mamyrǵa deıin jalǵasatyn baıqaýda jeke tulǵalar, bastamashyl toptar, úkimettik emes uıymdar baq synaı alady.
Baıqaýǵa volonterlik qyzmet tájirıbesine azamattardy tartý úshin tıimdi mehanızm men jaǵymdy jaǵdaı jasaý arqyly volonterliktiń júıeli damýyna baǵyttalǵan «Birgemiz» Volonter jylyn ótkizý konsepsııasyna saı jobalar qabyldanady.