Kókshetaý tehnıkalyq ınstıtýtynyń kýrsanty sý betine tógilgen munaıdy tazartýdyń tyń ádisin oılap tapty.
Janat Ádilhan – bolashaq órt sóndirýshi. Almaty óńiriniń týmasy osydan úsh jyl buryn Kókshetaý tehnıkalyq ınstıtýtyna oqýǵa túsken. О́z mamandyǵyn ǵylymsyz elestete almaıdy. Taıaýda jas ǵalym jetekshisimen birge ǵylymı jańalyq ashty. Ol jańalyq – oblys óńirinde ósetin qýraı, qoǵa tektes ósimdikterdiń kómegimen sý betine tógilgen munaıdy tazartý. Ǵylymı jańalyǵy elimiz boıynsha ótkizilgen baıqaýda júlde aldy.
–Ártúrli ǵylymı baıqaýlarǵa qatystym. Eń aldymen, kafedralar arasyndaǵy jarystan ozyp shyǵyp, odan soń oblystaǵy ǵylymı jobalar jarysynan birinshi oryn alyp, keıin respýblıka boıynsha joǵary oqý oryndary arasyndaǵy ǵylymı baıqaýda 1-oryn ıelendim, deıdi kýrsant Janat Ádilhan.
Jastardyń ǵylymǵa qumartýy ıgilikti is.
–Apatty tógilgen munaıdy sý betinen tazalaý úshin biz mynandaı 5 lıtrlik ydysqa sý quıyp, sýdyń betine munaıdy tógemiz. Sol munaıdyń betine aldyn ala daıyndalyp usatylǵan ósimdikter qaldyǵyn sebemiz. Kóbinese, qýraı tuqymdas jáne qoǵa tuqymdastaryn qoldanamyz. Olardy aldyn-ala zerthanaǵa ákelip, qurǵatyp, sodan keıin kólemi 2-5 mm qylyp usaqtaımyz. Sol usatylǵan ósimdikti tógilgen munaıdyń betine sebemiz. 10-15 mınýt ýaqyttyń ishinde ol ósimdikter ózine munaıdy sińirip alady. Munaıdy sińirip alǵany, mine baıqalyp tur, ósimdik qaraıyp ketedi. Keıin sý betinen osy ósimdikterdi súzip alyp tastaǵanda sý taza kúıinde qalady, deıdi Kókshetaý tehnıkalyq ınstıtýtynyń aǵa oqytýshysy, azamattyq qorǵanys kapıtany Rústem Sháripov.
Tehnıkalyq ınsıtýtta kýrsanttardyń ǵylymmen aınalysýy úshin bar múmkindik jasalǵan. Munda hımııalyq tájirıbeler jıi jasalyp, bolashaq qutqarýshylar órt shalǵan ǵımarattyń materıalynyń quramyn, onyń órtený prosesi qalaı júzege asatynyn, hımııalyq suıyqtyqtardyń janý jyldamdyǵyn, lapyldaý men jarylý kúshin de zertteıdi.