Túrkistan qalasy, Otyrar móltek aýdanynda kópbalaly ana men turmysy tómen eki otbasyǵa «KazTransGaz» AQ-y kómek retinde «kógildir otyndy» tegin kirgizip berdi.
Ortaq gaz qubyry úılerine kelip tursa da, qarjy qolbaılaý bolǵan olar gazǵa qosyla almaı kelgen. Jaǵdaıǵa túsinistikpen qaraǵan oblystyq energetıka jáne turǵyn úı kommýnaldyq sharýashylyq basqarmasy men «KazTransGaz» AQ-y ıgi isti qasıetti Ramazan aıynda júzege asyrdy.
Qalanyń ekologııalyq ahýalyn jaqsartý maqsatynda turǵyndardy tabıǵı gaz júıesine qosý jumystary qarqyndy júrgizilýde. Oǵan qosa, qatty otyn paıdalanatyn barlyq monshalar, áleýmettik jáne kásipkerlik nysandardy gazdandyrý kózdelip otyr. Bul baǵytta da túsindirme jumystary júrgizilip, nátıjesinde áleýmettik jáne kásipkerlik 9 nysan tabıǵı gazǵa aýystyrylǵan. Oblys ákimi О́mirzaq Shókeevtiń tapsyrmasyna sáıkes, jyl sońyna deıin Túrkistan qalasyn 100 paıyz gazben qamtamasyz etý josparlanyp otyr. Bul jumystar kezeń-kezeńimen júzege asyrylýda. Búginde qala turǵyndarynyń 41%-y tabıǵı gazben qamtylǵan.
Túrkistan oblysy