Búgin, «Qazmedıa» ortalyǵynda Prezıdent janyndaǵy Ortalyq kommýnıkasııalar qyzmetiniń uıymdastyrýymen Atyraý oblysynyń ákimi Baqtyqoja Izmuhambetov baspasóz máslıhatyn ótkizdi. Bul týraly Bnews.kz habarlady.
Baspasóz máslıhatynda oblys basshysy óńirdiń áleýmettik-ekonomıkalyq damýyna, memlekettik baǵdarlamalardyń júzege asyrylý barysyna keńinen toqtaldy. «Oblysymyz álemniń 50 elimen yntymaqtastyq ornatty. Búginde óńirde 400-deı shetel kompanııalary jumys isteıdi. Bıyl biz sonyń 25-ine kezekten tys tekserý júrgizdik. Onyń nátıjesi boıynsha shetel eńbekkerleri men ózimizdiń mamandar arasyndaǵy jalaqy alshaqtyǵy anyqtaldy. Qazirgi kezde oryn alǵan bul olqylyq túzetildi», dedi ol.
Basqa aımaqtar sekildi Atyraý oblysynda da sońǵy úsh jyl ishinde 8 medısınalyq nysan boı kótergen. Al apatty jaǵdaıda turǵan 11 mekteptiń ornyna 5 mekteptiń qurylysyn salý máselesi sheshimin tapty. Aldaǵy ýaqytta jergilikti bılik qalǵan bilim oshaǵyn salý máselesin retteıtin bolady.«Oblysta qamqorlyqty qajet etetin balalardy asyrap alýshy otbasy sany artty. Sonyń negizinde bir balalar úıin japtyq, taǵy bireýindegi balalardyń sany azaıdy. Bul aıta keterlikteı óte jaqsy jaǵdaı. Ekinshi jaǵynan, adamdardyń turmys jaǵdaıynyń jaqsarǵanyn kórsetedi», - dedi sóz oraıynda oblys ákimi.
Aımaq basshysynyń málimdeýinshe, 9 aı qorytyndysy boıynsha «Qoljetimdi baspana-2020» baǵdarlamasyna bólingen qarajat tolyq ıgerilgen jáne jyl sońyna deıin 22 úı paıdalanýǵa beriledi. Munan ózge údemeli ındýstrııalyq-ınnovasııalyq damý baǵdarlamasy sheńberinde quny 1,4 trln. teńge bolatyn 34 joba iske asyrylýda. Onyń aıasynda 4,5 myńnan asa jańa jumys orny ashylady dep kútilýde. Bıyl paıdalanýǵa berilgen armatýra shyǵarý zaýyty qurylysqa qajetti materıaldy shyǵarsa, alda iske qosylatyn gaz-hımııa zaýyty men kómirsýtekti óndirý kesheni elimizge qajetti ónimderdi daıyndaýdy qolǵa alady.
Ámirhan Almaǵanbetov.