Túrkistan qalasynda Prezıdent Qasym-Jomart Toqaevtyń Jarlyǵyna sáıkes arnaýly jıynǵa shaqyrylǵan áskerı mindettiler jumysy aıaqtaldy.
Qıyn sátte elmen, halyqpen birge ekendikterin kórsetken áskerıler blok-beketterde tártipti kúsheıtip, zalalsyzdandyrý jumystaryna atsalysty. Qalalyq polısııa ókilderimen birge móltek aýdandarda patrýldik qyzmet atqardy. Oblys ákiminiń orynbasary Sáken Qalqamanov áskerı mindettilerdi arnaıy jıynnyń aıaqtalýymen quttyqtap, oblys ákiminiń Alǵys hatyn tabys etti. «Arnaıy jıyn bir aı ishinde aýqymdy jumystar atqardy.
Atap aıtqanda, Maqtaaral aýdanynda bolǵan tehnogendi sıpattaǵy tótenshe jaǵdaıdyń saldaryn joıý úshin tartylǵan Maqtaaral, Jetisaı, Saryaǵash, Keles, Shardara aýdandaryndaǵy bólimsheleriniń sarbazdary erlikpen áskerı qyzmetin atqardy. Jıyn kezinde, árqaısyńyz janqııarlyq pen áskerı dıssıplınanyń úlgisi boldyńyzdar», degen oblys ákiminiń orynbasary, birqatar jaýyngerge Qorǵanys mınıstri general-leıtenant N. Ermekbaevtyń arnaıy Gramotasyn, Ońtústik óńirlik qolbasshylyǵy áskerleriniń qolbasshysy, general-maıor K. Qaraqulovtyń Alǵys hatyn tabystady.
Jalpy, oblys boıynsha 230 áskerı mindetti tirkelgen, onyń 50-i Túrkistan qalasyna jumyldyryldy. Olarǵa turaqty jumysynda beriletin jalaqy mólsheri ózgerissiz berilip otyrdy. Al, jumyssyz retinde tirkelgen azamattar 42500 teńge kóleminde aılyq alǵan.
Túrkistan oblysy