Bıyl UBT tapsyrý kezinde araqashyqtyqty saqtaý maqsatynda aýdıtorııadaǵy adamdar sany barynsha qysqartylady. Bul týraly Bilim jáne ǵylym mınıstri Ashat Aımaǵambetov málimdedi.
«Ulttyq biryńǵaı testileý belgilengen merzimde, maýsymnyń sońy men shildeniń basy aralyǵynda ótedi dep josparlanýda. Qazir daıyndyq jumystary qarqyndy júrip jatyr. Aldaǵy aptanyń seısenbisinde ótetin apparat keńesinde UBT-ǵa daıyndyq taqyrybyn talqylaımyz. UBT-ny ótkizý kezinde sanıtarlyq talaptar men sanıtarlyq-epıdemıologııalyq sharalardy kúsheıtýge nazar aýdarylady. Araqashyqtyqty saqtaý maqsatynda UBT tapsyrý kezinde aýdıtorııadaǵy adamdar sany barynsha qysqartylady», - dedi Ashat Aımaǵambetov.
Mınıstrdiń aıtýynsha, UBT kezinde maska, respıratorlar taǵý mindetteledi. Sonymen qatar, aýdıtorııany jeldetý jumystary iske asyrylady.