Alǵash ret «BUU modeli – Jańa Jibek joly» halyqaralyq konferensııasy onlaın formatta ótti. BUU-nyń qurylýynyń jáne Ekinshi dúnıejúzilik soǵystyń aıaqtalýynyń 75 jyldyǵyna arnalǵan is-sharany BUU Aqparattyq bıýrosy men Almatydaǵy QR SIM ókildiginiń qoldaýymen ál-Farabı atyndaǵy Qazaq Ulttyq ýnıversıteti uıymdastyrdy.
«BUU modeli - Jańa Jibek joly» – bul túrli elderdiń dıplomattary retinde BUU jumysyn beıneleıtin etetin stýdentter men joǵary synyp oqýshylaryna arnalǵan aýqymdy halyqaralyq joba. BUU-nyń turaqty damý jónindegi «Akademııalyq yqpal» baǵdarlamasyn tórtinshi kezeń qatarynan basqaryp kele jatqan ál-Farabı atyndaǵy QazUÝ atalmysh sharany alǵash ret onlaın formatta ótkizýde.
Joba qazirgi zamannyń jahandyq máselelerine jastardyń nazaryn aýdarýǵa, álem týraly birtutas kózqaras qalyptastyrýǵa, zertteý daǵdylaryn damytýǵa, mádenıetaralyq kommýnıkasııa men dıalog qurý arqyly shıelenisterdi eńserý qabiletterin damytýǵa baǵyttalǵan.
Búkilálemdik ǵalamdyq konferensııaǵa Azııa, Afrıka, Amerıka jáne Eýropadan 200-den astam stýdent pen mektep oqýshylary, sondaı-aq halyqaralyq sarapshylar, BUU jáne dıplomatııalyq orta ókilderi qatysty. Eki kún boıy jas spıkerler bitimgershilik pen adamzattyń turaqty damýynyń 17 maqsatyn júzege asyrý, sondaı-aq Covid-19 taralýyn boldyrmaý, jahandyq ekonomıkany qalpyna keltirý, sapaly onlaın bilim alýǵa qol jetimdilikti qamtamasyz etý, pandemııa kezinde áleýmettik qoldaý jáne taǵy basqa ózekti máselelerdi talqylady.
«Bıyl akademııalyq qoǵamdastyqtyń zııatkerlik áleýetin zamanaýı álemniń máselelerin sheshýge jumyldyrýǵa arnalǵan BUU-nyń «Akademııalyq yqpal» baǵdarlamasynyń bastaý alǵanyna 10 jyl toldy. BUU kún tártibi men turaqty damý maqsattaryn júzege asyrýda jastarǵa mańyzdy ról berilýde, bul jahandyq pandemııa kezinde erekshe ózekti», – deıdi konferensııany ashqan ál-Farabı atyndaǵy QazUÝ-dyń Birinshi prorektory professor M.Búrkitbaev.
QR Parlamenti Májilisiniń depýtaty Serik Seıdýmanov BUU modeliniń zamanaýı jas kóshbasshylary adamzat órkenıetin saqtaýdyń joǵary ıdeıasymen birigip óz elderiniń, jalpy búkil álemniń turaqty damýyna yqpal etetindigin atap ótti. Sonymen qatar ol konferensııa qatysýshylaryn aıtýly kúnmen – BUU-nyń 75 jyldyǵymen quttyqtap, olarǵa jemisti jumys tiledi.
Sonymen qatar, BUU modeliniń qatysýshylaryn onlaın rejimde qoshamettep sóz sóılegenderdiń qatarynda: Birikken Ulttar Uıymynyń ǵalamdyq kommýnıkasııalar departamentiniń ókili Vlastımıl Samek, IýNESKO-nyń klasterlik keńsesiniń dırektory Krısta Pıkkat, Dúnıejúzilik densaýlyq saqtaý uıymynyń Qazaqstandaǵy ókili Kerolaın Klarınval, QR SIM Almatydaǵy ókildiginiń basshysy Erlan Ysqaqov, sondaı-aq Almatydaǵy QHR Bas konsýly – Gen Lıpın, AQSh-tyń Bas konsýly – Erık Meıer, Reseı Federasııasynyń Bas konsýly – Evgenıı Bobrov boldy.
ALMATY