Túlkibas aýdanynyń ortalyǵyndaǵy Abaı atyndaǵy mektep-lıseıiniń 2000 jyly mektep bitirgen túlekteri kópbalaly muqtaj otbasyǵa aýdan ortalyǵynan 5 bólmeli úıdi syıǵa tartty.
Qasıetti Ramazan aıynda 20 jyldyǵyn ózgesheleý ótkizgisi kelgen túlekter osyndaı sheshimge kelipti. Bul oraıda túlekter búgingi kúnge deıin aýdan ortalyǵyndaǵy jaldamaly páterde turyp kelgen Hajibekovter otbasynyń turmystyq jaǵdaıyn eskergen. Kópbalaly otbasy otaǵasynyń birinshi top múgedektigine beriletin járdemaqy men ataýly áleýmettik kómek qarjysyna kún kórip otyr. Igi sharaǵa aýdandyq máslıhat hatshysy S.Seısenbaev, jazýshy, jýrnalıst, qoǵam qaıratkeri M.Baıǵut jáne aýdandyq «Qoǵamdyq kelisim keńesiniń» tórasy Q.Anashev bastaǵan Abaı mektebiniń 56 jyl burynǵy túlekteri men aýdannyń bas ımamy M.Serik qatysyp, baspanaly bolǵan otbasyn jańa qonysymen quttyqtady.
Abaı atyndaǵy mektep-lıseıinde osyndaı jaqsy dástúr qalyptasyp otyr. Olaı deıtinimiz sońǵy eki jyl qatarynan mektep-lıseıdiń 1998 jáne 1999 jylǵy túlekteri - kópbalaly muqtaj eki jalǵyz basty anaǵa aýdan ortalyǵynan úı alyp bergen bolatyn.