Bıylǵy tórtinshi toqsan burynǵydan ózgerek bastalǵany belgili. Soǵan saı endi bólekshe bitip jatyr. Onyń bir belgisi bolar, sońǵy qońyraý bıyl qashyqtan soǵyldy.
«Bıylǵy sońǵy qońyraýdyń úni men syry da erek. Sebebi oqý jylynyń aıaqtalýyna oraı uıymdastyrylǵan merekelik shara onlaın-rejımde ótti. «Nazarbaev Zııatkerlik mektepteri» derbes bilim berý uıymynyń fılıaly «Nur-Sultan qalasyndaǵy Halyqaralyq mektepte» sońǵy qońyraý sharasy bastaýysh mektepte synyp saǵattary, al negizgi mektepte shańyraq saǵattary formatynda onlaın rejımde MS Teams platformasynda ótkizildi», dep habarlaıdy NZM baspasóz qyzmeti.
Qazaqstan Respýblıkasynyń memlekettik Ánuranynan bastaý alǵan sońǵy qońyraý sharasy Nur-Sultan qalasyndaǵy Halyqaralyq mektep dırektory Ǵalııa Syzdyqovanyń beınequttyqtaýymen jalǵasyn tapty. Mektep basshysy merekelik sharaǵa qatysýshylardy oqý jylynyń aıaqtalýymen quttyqtady:
«Osynaý qajyrly jumysymyzdyń taǵy bir belesi 2019-2020 oqý jyly da óz máresine jetti. Bul oqý jyly árqaısymyz úshin óz oqıǵalarymen, óz jetistikterimen este qaldy. Kezdesken qıyndyqtarǵa qaramastan, biz úshin oqý jyly jemisti bolǵanyn zor senimmen aıta alamyn. Bul sózimdi bizdiń oqýshylarymyzdyń oqý úlgeriminiń joǵary kórsetkishteri dáleldeıdi. 2019-2020 oqý jyly aıasynda mektebimiz Halyqaralyq Bakalavrıattyń Dıplomdyq baǵdarlamasy boıynsha avtorızasııa aldy. Sondaı-aq, CIS Halyqaralyq mektepter keńesiniń músheligine qabyldandy. Ustazdarymyz halyqaralyq jáne respýblıkalyq deńgeıdegi pedagogıkalyq sheberlik baıqaýlarynyń jeńimpazdary atandy. Atalǵan jetistikterdiń qataryn oqýshylarymyzdyń jeńisteri tolyqtyra túsedi. Bul degenimiz, oqý jylynyń tabysty aıaqtalǵandyǵynyń dáleli. Búgingi barlyq alǵys pen jyly sózder qurmetti ustazdar qaýymyna arnalady, óıtkeni dál sizderdiń arqalaryńyzda balalar ǵajaıyp bilim áleminiń esigin ashady. Árıne, bul rette bizge árdaıym qoldaý kórsetip, jetistikke birge jetelegen ata-analardyń da eńbegin aıtpaı ketýge bolmas. Biz jyl boıy sizderdiń qoldaýlaryńyzdy, rııasyz kóńilderińizdi, qamqorlyqtaryńyzdy sezindik. Biz bul belestiń aıaqtalyp, aldaǵy oqý jylynda mektep qabyrǵasynda qaıta qaýyshamyz degen úmittemiz», deıdi Ǵalııa Syzdyqova.
Atalǵan vedomstvo ókiliniń habarlaýynsha, balalardyń «Ustazym» atty ánine túsirilgen «Ustaz aty bıik ári máńgilik» taqyrybyndaǵy beınejoldaýlary sońǵy qońyraý sharasyna ózgeshe bir reńk berdi.