Búgin megapolıste iri saýda-oıyn-saýyq oryndarynyń jumysy qaıta jandandy. Eki aıdan astam ýaqyt boıy oqshaýlanǵan qala turǵyndary birden qyzmetine kirisken nysandarǵa aǵyla bastaǵandyqtan, sanıtarlyq normalardy saqtaý máselesi aldyńǵy shepke qaıta shyqty.
Dúısenbi kúngi onlaın-brıfıngte Almaty qalasynyń memlekettik bas sanıtar dárigeri Jandarbek Bekshın maska taqpaǵandar men ǵımaratqa maskasyz kirgizgen zańdy tulǵalarǵa salynatyn aıyppuldardyń mólsherin aıtty.
Jandarbek Bekshın jumysyna qaıta kirisken mekemelerde, ǵımarattarda maskasyz júrgen adamǵa 5 AEK – 13 890 teńge aıyppul taǵylatynyn aıtty. Al, nysan ıesine azamatty maskasyz kirgizgeni úshin 15 AEK – 41 670 teńge aıyppul salynady.
«Adamdar eriksiz aýzy-murnyn, kózin ustamaýy úshin kóshede de maska taǵyp júrýdi talap etemiz. Sondaı-aq, ǵımarattarǵa – dúkender, bazarlar, saýda-oıyn ortalyqtaryna, dárihanalarǵa kirgende maska taǵý kerek. Biz ishki ister organdarymen birge ákimshilik jaýapkershilik sharalaryn qoldana alamyz. Eger azamat karantın erejesin buzsa, atap aıtqanda maska taqpasa, 5 AEK – 13 890 teńge, azamattardy ǵımaratqa maskasyz kirgizse, nysannyń ıesi - laýazymdy tulǵa da ákimshilik jaýapqa tartylyp, 15 AEK – 41 670 teńge tóleıdi. Barlyq nysanda maska taǵýdy talap etemiz», – dedi Jandarbek Bekshın.
Almaty qalasynyń memlekettik bas sanıtar dárigeri aıyppul mólsheri bıznes túrine qaraı esepteletenin aıta kele: «Eger shaǵyn bıznes bolsa, aıyppul 100 AEK – 277 800 teńge, orta bıznes bolsa, 200 AEK – 555 600 teńge, iri kásip bolsa, zańdy tulǵaǵa 500 AEK – 1 mıllıon 389 myń teńge bolady. Karantın erejesin saqtaýdy talap etý úshin osyndaı qatań sharalar qabyldaýǵa májbúrmiz», dedi
Jandarbek Bekshınniń málimdeýinshe, aıyppuldyń eń úlken – 1 mıllıon 389 myń teńge. Mundaı ákimshilik jaýapkershilikti iri bıznes ókili óz moınyna alady.
ALMATY