Premer-Mınıstr Asqar Mamınniń tóraǵalyǵymen ótken Úkimettiń selektorlyq otyrysynda mal sharýashylyǵyn damytý máseleleri qaraldy. Bul týraly Premer-Mınıstrdiń baspasóz qyzmeti habarlady.
Aýyl sharýashylyǵy mınıstri Saparhan Omarov, Pavlodar oblysynyń ákimi Ábilqaıyr Sqaqov, Qaraǵandy oblysynyń ákimi Jeńis Qasymbek, sondaı-aq agrobıznes ókilderi baıandama jasady.
Mal sharýashylyǵynda 4% deńgeıinde turaqty ósim saqtalýda. Osy jyldyń sońyna deıin salanyń jalpy óniminiń kólemin 2,6 trln teńgege deıin, iri qara mal basyn – 7,8 mln basqa deıin, usaq mal basyn – 17,5 mln basqa deıin jetkizý josparlanǵan. 9 broıler qus fabrıkasy salynady, olar qosymsha 105 myń tonna qus etin óndiretin bolady. Sonymen qatar jumys istep turǵan qus fabrıkalarynda óndiristi ulǵaıtý kózdelgen. Elimizdiń qajettiligin tolyq qamtamasyz etýge basymdyq beriledi. Jyl saıyn 25 sút-taýar fermasyn salý 2025 jylǵa qaraı qaıta óńdelgen sútti 500 myń tonnaǵa ulǵaıtý esebinen ózin-ózi tolyq qamtamasyz etýge kóshýge múmkindik beredi.
Qazirgi ýaqytta mal sharýashylyǵy ónimderin qaıta óńdeý salasynda josparlanǵan jáne iske asyrylyp jatqan ınvestısııalyq jobalardyń kólemi 717 mlrd teńgeden asady.
«Úkimet mal sharýashylyǵy ónimderiniń jetkilikti bolýyna jáne eksportty ulǵaıtýǵa basa nazar aýdaratyn bolady. Iri óńdeýshi kásiporyndardyń aınalasynda, onyń ishinde jergilikti óndirýshilerge eksporttyq proseske qatysýǵa múmkindik beretin transulttyq kompanııalar men ınvestorlardyń qatysýymen zákirli kooperasııa erekshe basymdyqta bolýy tıis», - dedi A. Mamın.
Úkimet basshysy sátti mysal retinde Túrkistan oblysyndaǵy túıe sútin óńdeý zaýytyn keltirdi. Investordyń shıkizatty tartymdy baǵamen satyp alýynyń arqasynda sútke suranys artyp, túıe sharýashylyǵy qarqyndy damı bastady. Bir túıeniń quny el boıynsha 2 esege ósti. Sala asa tartymdy bola bastady.
Premer-Mınıstr Aýyl sharýashylyǵy mınıstrligine osy baǵyttaǵy úılestirý jumystaryn kúsheıtýdi tapsyra otyryp, mal sharýashylyǵynyń basqa salalarynda da osyndaı kooperasııany damytý qajet ekenin atap ótti.
A. Mamın usaq qara mal basyn kóbeıtýge erekshe nazar aýdarýdyń qajettigin, otandyq qus sharýashylyǵyn odan ári keńeıtýdiń jáne iri qara mal basyn arttyrý boıynsha júıeli jumystyń mańyzdylyǵyn atap ótti.
Budan ózge, Úkimet basshysy búginde astyq egetin 300 iri jáne ortasha sharýashylyqtardy mal sharýashylyǵyna tartýǵa múmkindiktiń bar ekenine, munyń ózi salany damytýǵa qosymsha serpin beretinine toqtaldy.
Syrtqy naryqtarda aıtarlyqtaı suranysqa ıe shoshqa etin óndirý — mal sharýashylyǵy ónimderiniń eksportyn ulǵaıtýdaǵy perspektıvaly baǵyt retinde ataldy.
«Jalpy, mal sharýashylyǵy salasy turaqty damyp keledi. Memleket barlyq qoldaý sharalaryn kórsetip jatyr», - dep A. Mamın, barlyq alǵa qoıylǵan mindetterdi júzege asyrýdy tapsyrdy.