«Rýhanı jańǵyrý» baǵdarlamasy aıasynda Qazaq ulttyq qyzdar pedagogıkalyq ýnıversıtetinde «Ulttyq tárbıe – qundylyq bastaýy» taqyrybynda respýblıkalyq jıyn ótti, dep habarlady QyzPÝ-dyń qoǵammen baılanys qyzmeti.
Buǵan deıin oqý ornynda «О́rkendeý» jobasy qolǵa alynǵan bolatyn. Maqsat – jas urpaqtyń boıynda otbasylyq qundylyqtardy qalyptastyrý jáne ony damytý. Joba sheńberinde «Ata mektebi», «Áje mektebi», «Áke mektebi», «Ana mektebi», «Aǵa mektebi» jáne «Jeńge mektebi» syndy tárbıe mektepteri qurylyp, búginde olar elimizdiń mektepterinde birneshe baǵyt boıynsha jumys isteýde.
Onlaın formatta uıymdastyrylǵan semınar barysynda atalǵan bastama aıasynda atqarylǵan isterdiń nátıjeleri ekshelip, aldaǵy jospary talqylandy. Eki bólimnen turǵan jıynnyń alǵashqy kezeńinde «О́rkendeý» jobasynyń mańyzy aıtyldy.
Onda L.N. Gýmılev atyndaǵy Eýrazııa ulttyq ýnıversıtetiniń Áleýmettik-mádenı damý jónindegi prorektory, atalǵan jobanyń ǵylymı keńesshisi Dıhan Qamzabekuly, atalmysh joǵary oqý ornynyń professory Qadısha Qadyrqyzy, Y. Altynsarın atyndaǵy Ulttyq bilim akademııasynyń aǵa ǵylymı qyzmetkeri Bolat Baqytbekuly, «Jas ulan» biryńǵaı balalar men jasóspirimder uıymynyń tóraıymy Dınara Taıbasarqyzy, Qyzdar ýnıversıtetiniń О́ner jáne mádenıet fakýltetiniń dekany Sarash Qońyrbaeva, Bilim berýdi jańǵyrtý ortalyǵynyń ınnovasııa bóliminiń basshysy Roza Aqpanqyzy, Nur-Sultan qalalyq jastar saıasaty basqarmasynyń basshysy Dáýlet Káribek, «Nur Otan»partııasynyń «Jas Otan»jastar qanaty tóraǵasynyń keńesshisi Anııa Meıirqyzy jáne QyzPÝ-dyń «Rýhanı jańǵyrý» jobalyq keńsesiniń úılestirýshisi Gaýhar Baıtashova taqyryp tóńireginde pikir almasty.
Al ekinshi bólimde Almaty oblysyndaǵy mektep dırektorlary men muǵalimderi jobanyń alǵashqy nátıjelerin sarapqa salyp, baıandamalar jasady. Sonymen qatar onlaın basqosýǵa mektep oqýshylary da qatysyp, synyp deńgeıinde «О́rkendeý» jobasynyń júzege asyrylýy týrasynda óz oılarymen bólisti. Atap aıtqanda, Nur-Sultan qalasyndaǵy № 68 mektep-gımnazııasynyń 7-synyp oqýshysy Karına Joldasqalıeva bul bastamanyń jastar arasynda ulttyq qundylyqtardy áspetteýge hám dáripteýge tıgizip otyrǵan úlesin áńgimeledi.
– «О́rkendeýdiń» basty maqsaty – óskeleń urpaqqa bala tárbıesindegi ata-ananyń alatyn ornynyń erekshe ekendigin jete uǵyndyrý, januıadaǵy ata-ana men bala arasyndaǵy qarym-qatynasty nyǵaıtý jáne otbasy músheleri arasyndaǵy qaıyrymdylyq, baýyrmaldyq syndy qundylyqtardy qalyptastyrý. Bilim uıalarynda uıymdastyrylǵan tárbıe mektepteri ozyq salt-dástúrdi taldap túsindirip jáne ony dáripteýdi úıretýdiń alǵashqy baspaldaǵynyń qalanýyna negiz boldy. Bastama otbasy ınstıtýtyndaǵy tárbıeni búgingi mektep tárbıesimen ushtastyra jolǵa qoıdy dep tolyq senimmen aıta alamyz. Tárbıe bastaýy mektepten bastaý alatyndyǵyn eskeretin bolsaq, bul shara óz jemisin beredi degen oıdamyz, – deıdi Qazaq ulttyq qyzdar pedagogıkalyq ýnıversıtetiniń baspasóz jáne qoǵammen baılanys bóliminiń basshysy Jandar Asan.
Onyń aıtýynsha, buǵan deıin joba elimizdiń birneshe óńirindegi mektepterde tanystyrylǵan bolatyn.
Sondaı-aq bilim uıalarynda Qyzdar ýnıversıtetiniń oqytýshylarynyń qatysýymen «Uly babalardan taǵylym» atty tarıhı-tanymdyq sharalar serııasy da uıymdastyryldy. Atap aıtqanda, mektepterde «Ata mektebi» jáne «Áke mektebi» baǵyttary boıynsha «Ul tárbıesi – ult tárbıesi», «Ákeshim – asqar taýym», «Áje mektebi» baǵyty boıynsha «Qyz tárbıesi – ult tárbıesi», «Týǵan jer» baǵyty boıynsha «Otan meniń kishi otbasym», «Áje mektebi», «Ana mektebi» baǵyttary boıynsha «Jeńgemmen ótkizgen bir kúnim» taqyrybyndaǵy tárbıe sabaqtary jáne «Zerde» baǵyty boıynsha «О́nege otbasynan bastalady» atty ıntellektýaldy baıqaýlar da ótken bolatyn.
Aıta keteıik, «Ulttyq tárbıe – qundylyq bastaýy» taqyrybyndaǵy respýblıkalyq semınar «Jas Otan»Jastar qanaty, Qazaq ulttyq qyzdar pedagogıkalyq ýnıversıteti, Respýblıkalyq «Jas ulan» biryńǵaı balalar men jasóspirimder uıymy men «Aldaspan» Qorynyń uıytqy bolýymen uıymdastyryldy.
ALMATY