Tótenshe jaǵdaı rejimi jáne karantındik shekteýlerdiń qyspaǵyna qaramastan, Qaraǵandy oblysynyń ekonomıkasy damyp keledi eken. Bul salada jyldy jaǵymdy jańalyqpen aıaqtaýymyz ábden múmkin: jalpy óńirlik ónimniń úsh paıyzdyq ósýi kútilýde, dep atap ótti Qaraǵandy oblysynyń ákimi Jeńis Qasymbek Saryarqa telearnasynda ótken brıfıng barysynda.
– Qazirgi qarqyndy báseńdetpeý úshin daǵdarysqa qarsy jospar ázirlendi. Oǵan ekonomıkanyń negizgi salalary boıynsha 108 is-shara kiredi. Investısııa tartýǵa erekshe kóńil bólinedi. Oblysta 17 myńnan astam jańa jumys ornyn qurý baǵytynda 1 trln teńgeden astam somanyń 41 ınvestısııalyq jobasy josparlanǵan, – dedi oblys basshysy.
Osy oraıda, Qaraǵandy oblysynda koronavırýsqa qarsy kúres shyǵyndaryna baılanysty jergilikti bıýdjet jappaı is-sharalar bóliginde ońtaılandyrylypty. Degenmen, mundaı qadam josparlanǵan áleýmettik baǵdarlamalarǵa áser etpeıdi, dep málimdedi oblys ákimi Jeńis Qasymbek. Iаǵnı, bul jergilikti atqarýshy bılik óziniń barlyq mindettemelerin oryndaıdy degen sóz.
Jeńis Qasymbek únemdelgen aqsha daǵdarys pen epıdemııaǵa qarsy is-sharalarǵa baǵyttalatynyn habarlady.
– Josparlanǵan áleýmettik baǵdarlamalardy qysqartqan joqpyz, olardyń barlyǵy tolyq kólemde júzege asyrylatyn bolady. Ýáde etkenimizdeı, turǵyn úıler men joldardy salyp jatyrmyz. Biz bıýdjetti ońtaılandyrdyq. Biraq, bul tek forýmdar, kórmeler, mádenıet jáne sport salasyndaǵy is-sharalar ótkizý sııaqty baǵyttarǵa qatysty. Halyq aldyndaǵy barlyq áleýmettik mindettemeler oryndalady, – dedi oblys ákimi.
«Tarta jeseń, taı qalady» degen. Únemdelgen qarajattyń bir bóligi epıdemııaǵa qarsy sharalarǵa jiberildi. Atap aıtqanda, qajetti medısınalyq qural-jabdyqtardy, ókpeni jasandy demaldyrý apparattaryn satyp alýǵa jumsaldy. Sonymen qatar, bul qarajattyń birazy «Nurly jer» baǵdarlamasy boıynsha turǵyn úı jáne ınjenerlik-kommýnıkasııalyq ınfraqurylym qurylysyna baǵyttalmaqshy.
Respýblıkalyq jáne oblystyq bıýdjetten dárigerler úshin jeke qorǵaný quraldaryn, medısınalyq jabdyqtardy satyp alýǵa, tótenshe jaǵdaıdy qamtamasyz etý boıynsha is-sharalardy ótkizýge jáne basqa da qajettilikterge 4,8 mlrd teńge bólingenin habarlady oblys ákimi.
Qazirgi tańdaǵy basty mindetterdiń biri – turǵyndardy tabysy turaqty jumysqa ornalastyrý. Osy baǵytta «Jumyspen qamtýdyń jol kartasy» baǵdarlamasy aıasynda nysandardy salý, jóndeý jáne abattandyrý boıynsha ınfraqurylymdyq jobalarǵa 63,7 mlrd teńge bólingen. Bul jumystarǵa jergilikti kompanııalar jumyldyrylýda.
Sonymen qatar, Jeńis Qasymbek «Eńbek» nátıjeli jumyspen qamtýdyń jáne jappaı kásipkerlikti damytýdyń baǵdarlamasyn júzege asyrýǵa 8 mlrd teńgeden astam qarjy bólingenin málim etti. Jumyssyzdar kásiptik daıarlaý men qaıta oqytý kýrstarynan ótip, kásipkerlik negizderin oqyp, shaǵyn nesıe nemese granttar ala alady. Sondaı-aq, áleýmettik jáne qoǵamdyq jumystar, jastar tájirıbesi sııaqty kómek túrleriniń de qarastyrylǵanyn atap ótti oblys ákimi.