Túrkistan oblysy Jetisaı aýdanynyń baǵbandary órik baýynyń alǵashqy ónimderin ala bastady. Atameken aýyl okrýgi Maqtashy aýylyndaǵy «Arsenal-Sad» JShS-y bıyl 30 gektar órik alqabynyń ár gektarynan 20 tonnaǵa jýyq ónim alamyz dep otyr.
Atalǵan qojalyqta búginde jalpy kólemi 650 gektar qarqyndy baý jaıqalyp tur. Onyń 90 gektaryn alma, 110 gektaryn júzim, 30 gektaryn órik, 370 gektaryn shabdaly, shıe, anar sekildi jemis-jıdekter quraıdy. Seriktestik agronomy Erlik Sádibekovtyń aıtýynsha, óriktiń baǵasy kelisine 700 teńgeden bosatylýda.
«Bizdiń sharýa qojalyq 2011 jyly 380 gektar jerge baý ekken bolatyn. Alǵashqy ónimderimizdi 2013 jyldan bastap ala bastadyq. Búginde órikterimiz pisip, jetilip tur. Negizinen Qazaqstanǵa jemis-jıdek túrleri kóbinde shetelden tasymaldanady. Osy olqylyqtyń ornyn toltyrý maqsatynda qolǵa alǵan isimizdiń búginde jemisin kórip otyrmyz. Máselen, bizde óriktiń bir kelisi bazarlar men saýda oryndarynda 600-700 teńge kóleminde saýdalanýda», deıdi Erlik Sádibekov.
Túrkistan oblysy