Elorda ákimdiginde TJ aldyn alý jáne saldaryn joıý boıynsha komıssııa otyrysy ótti. Nur-Sultan qalasy ákiminiń orynbasary Baqtııar Mákenniń tóraǵalyǵymen ótken jıynda karantın sharalaryn saqtaý jáne shomylý maýsymyna daıyndyq máselesi talqylandy.
Jıynǵa qatysýshylar atap ótkendeı, qalada koronavırýs ınfeksııasynyń taralýynyń aldyn alý úshin sanıtarlyq-profılaktıkalyq jumystar istelýde. Qazir stýdentter men oqýshylardyń qaladan shyǵý jáne kirý algorıtmi, áleýmettik osal toptyń, ásirese az qamtylǵan halyqtyń KVI-na taldaýdy tegin jasaý máselesi qaralyp jatyr.
Taǵy bir mańyzdy másele – aldaǵy shomylý maýsymyna daıyndyq. Nur-Sultan qalasy boıynsha Tótenshe jaǵdaılar departamenti basshysynyń m.a. Esen Baıyrovtyń aıtýynsha, osy kúni elordada 90 tyıym salý belgisi, 20 aqparattyq stend, 20 qalqymaly belgi ornatyldy. Jalpy, sýǵa túsý maýsymy kezinde kún saıyn jeke quramnyń 20 qyzmetkeri, 14 qaıyq, 1 gıdrosıkl patrýldeýge shyǵady. Sondaı-aq qoǵamdyq qutqarýshylar men qala ákimdiginiń azamattyq qorǵanysty qamtamasyz etý ortalyǵynyń 15 mamany jumyldyralady.
Esen Baıyrov órt qaýipsizdigi men balalardyń terezeden quraý oqıǵalaryn da tilge tıek etti. Sońǵysy qaladaǵy ózekti másele bolyp tur. Sebebi 2018 jyldan bastap búginge deıin 51 búldirshin terezeden qulap ketken.
Elorda ákiminiń orynbasary Baqtııar Máken jıyndy qorytyndylaı kele, qalalyq jaǵajaılardyń abattandyrylýy men sýdaǵy qaýipsizdikti qamtamasyz etý qajettiligin aıtty.
«Qurmetti áriptester, kún jylynyp, sýǵa túsý maýsymynyń erte bastaýyna oraı, qala aýmaǵyndaǵy tegin jaǵajaılar ashyla bastaıdy. Olardy sý aıdyndaryndaǵy qaýipsizdik erejelerine sáıkes abattandyrý kerek. Jaǵajaılarda basqa da qajetti quraldardan bólek sýdyń temperatýrasy, tereńdigi men basqa da mańyzdy málimetterdi qamtıtyn aqparattyq stend ornatylýy tıis. Turǵyndar jaǵajaıda karantın men sanıtarlyq normalardy saqtaýy kerek», – dedi ákimniń orynbasary.
Baqtııar Máken balalardyń sýdaǵy qaýipsizdigi úshin aldymen ata-analary jaýapty ekenin eske saldy. Sondyqtan qandaı jaǵdaı bolsa da, balalardyń sýǵa úlkenderdiń qaraýysyz túsýine jol berilmeýi kerek.