Densaýlyq saqtaý mınıstri Ortalyq kommýnıkasııalar qyzmetinde ótken onlaın brıfıngte eldegi dezınfeksııalyq sharalardyń ári qaraı jalǵasa beretinin aıtty.
«Úkimettiń vedomstvoaralyq komıssııasynyń sheshimimen sanıtarlyq sharalardy engizý jáne ony saqtaýǵa mán beriledi. Biz dezınfeksııalyq sharalardy ári qaraı jalǵastyra beremiz. Kóshelerde, dúkenderde, transporttarda dezınfeksııalyq sharalardy jasaý asa mańyzdy. Saqtyq sharalaryn qatań ustansaq, ınfeksııany toqtata alamyz», - dedi Eljan Birtanov.
Sondaı-aq mınıstr tótenshe jaǵdaı kezinde saqtalǵan karantın sharalarynyń arqasynda elde vırýs juqtyrǵandardyń sany ózge eldermen salystyrǵanda kóp bolmaǵanyn sóz etti.
«Sońǵy eki aıdyń ishinde elimizde joǵary deńgeıde karantın rejımi saqtaldy. Bul árıne barlyǵymyz úshin jeńil bolǵan joq. Ol ekonomıka men áleýmettik ómirge qatty áser etti. Turǵyndardyń aýyzbirshiligi men saqtyq sharalarynyń arqasynda elimizdegi indet jaǵdaıy baqylaýda dep aıtýǵa bolady. Sebebi basqa eldermen salystyrǵanda bizde naýqastar sany men qaıtys bolǵandar sany kóp emes», dedi ol.
Budan soń, ol qazaqstandyqtardy áli de saqtyq sharalaryn qatań ustanýǵa shaqyrdy.
«Elimizde pandemııa áli bitken joq, vırýs áli de aramyzda bar. Sol sebepti sanıtarlyq sharalardy saqtaý mańyzdy. Ár adam óziniń jáne jaqyndarynyń densaýlyǵyna jaýapty ekenin umytpaýy kerek. Osy aptanyń basynda Memleket basshysy Úkimetke jáne jergilikti memlekettik organdarǵa taǵy da naqty tapsyrmalar berdi. Tapsyrmaǵa sáıkes, biz sanıtarlyq sharalardy baqylaýda ustaımyz. Osy rette azamattar da árbiriniń densaýlyǵy óz qolynda ekenin umytpaýy kerek», - dedi E.Birtanov.