Koronavırýstiń kesirinen toqtatylǵan Anglııa Premer-lıga oıyndary 17 maýsymda jalǵasady. Bul jaıynda atalmysh memlekettiń fýtbol qaýymdastyǵynyń baspasóz qyzmeti málimdedi.
17 maýsymda 28 týrdyń keıinge shegerilgen kezdesýleri ótedi. Bul básekelerde «Manchester Sıtı» men «Arsenal» jáne «Aston Vılla» men «Sheffıld Iýnaıted» klýbtary sheberlik baıqasady. 19 maýsymda 30 týr oıyndaryn teledıdardan tamashalaımyz. Bul kezdesýlerdiń barlyǵy da kórermendersiz ótedi.
Anglııa chempıonaty toqtalyǵanǵa deıingi jaǵdaıǵa kelsek, qorjynynda 82 upaıy bar «Lıverpýl» jeke-dara kósh bastap tur. Endi olardy eshkimniń qýyp jete almaıtyny anyq. Ekinshi oryndaǵy «Manchester Sıtıdiń» «Lıverpýlden» baqandaı 25 upaıy kem. Alaıda qalalyqtar basty qarsylasynan bir oıyn kem ótkizdi. Úshinshi orynda - «Lester». Olar 53 upaı jıyp úlgerdi. Sondaı-aq, «Chelsı» (48 upaı) men «Manchester Iýnaıted» (45 upaı) úzdik bestiktiń sanatynda. Al kósh sońyndaǵy «Norvıchtiń» nebári 21 upaıy ǵana bar.