Tasqyn sýdan zardap shekken Maqtaaral aýdany Jańaturmys, Jeńis, Ferdoýsı, Dostyq, О́rgebas eldi mekenderiniń 6314 azamatynan Úkimet tarapynan 100 myń teńgelik ótemaqyǵa berý maqsatynda qujattar qabyldanǵan. Onyń 6020-sy kóshi-qon polısııasynyń aqparatymen rastalyp, qarjy aýdarý úshin bekitýge usynylypty.
Bul týraly topan sýdan zardap shekken turǵyndarmen kezdesken Qazaqstan halqy Assambleıasy oblystyq hatshylyǵynyń meńgerýshisi, Maqtaaral aýdanyndaǵy oblystyq shtabtyń áleýmettik máseleler jónindegi jetekshisi Ǵanı Rysbekov málimdedi. Sondaı-aq, ol kásipker A.Ýsmanovtyń qory esebinen 5202 otbasyǵa 1000 AQSh dollarynan berilip jatqanyn da jetkizdi. Qazirgi tańda 13 aýyldan 5342 qujat qabyldanyp, olarǵa monıtorıng jumystary júrgizilgen. Nátıjesinde 4839 azamattyń qujaty rastalyp otyr. «Búginge deıin 3 transhpen 3375 otbasyǵa belgilengen 1000 AQSh dollar ótemaqy aýdaryldy. Qalǵan januıalarǵa da qarjy aýdarý jumystary júrgizilýde. Bul qarjy negizinen tótenshe jaǵdaı jarııalanǵan eldi mekenderde topan sý basqan sátte turyp jatqan azamattarǵa tıesili. Al, olardyń arasynda páter jaldap turyp jatqan jandar da bar. Osy máselelerdi qarap tıisti sheshim qabyldaý maqsatynda aýdanda arnaıy komıssııa qurylyp, jumys istep jatyr. Sonyń nátıjesinde 1438 qujat qaıta qaralyp, 1319-y oń qorytyndy alǵan. Aldaǵy aptada bul jumystar tolyǵymen aıaqtalýy tıis. Osy maqsatta Jańajol aýyldyq okrýgine qosymsha 4 bilikti maman bólinip otyr», dedi Ǵanı Qurmashuly.
Sonymen qatar, evakýasııalyq beketterde ótken kezdesý barysynda buzylyp qaıta salynatyn úılerdiń qujattary túgel bolmaýyna baılanysty qıyndyqtar týyndap otyrǵany da aıtyldy. Máselen, topan sýda qalǵan 870 úıdiń 4-inde jeke kýálik kóshirmesi, 19-ynda menshik ıesi týraly málimetteri, 7-eýinde memlekettik aktisi, 8-niń tehnıkalyq pasporty joq. Búginde oblystyq qurylys basqarmasyna 834 úıdiń qujattary tapsyrylsa, 832-si tekserýden ótken, 2 qujat qaıta túzetýge jiberilipti. Sondaı-aq, Ǵanı Rysbekov oblystyq tótenshe jaǵdaılar jónindegi shtab janynan qurylǵan azyq-túlik qoımasynda bolyp, ondaǵy atqarylyp jatqan sharýalarmen de tanysty. Qoımaǵa búginge deıin elimizdiń túkpir-túkpirinen 740 tonnadan astam taýar kelip tússe, onyń 320 tonnaǵa jýyǵy evakýasııalyq pýnktterdegi turǵyndarǵa taratylyp berilgen.
Túrkistan oblysy