Jańa Zelandııada vırýs juqtyrǵan naýqastyń anyqtalmaǵanyna 17 kún boldy. Al sońǵy on kúnde el turǵyndary Oklend qalasynda turatyn 50-ler shamasyndaǵy sońǵy naýqastyń jazylǵanyn kútken. Búgin Densaýlyq saqtaý mınıstrligi COVID-19-dan emdelip jatqan adamnyń joq ekenin resmı málimdedi.
Bul jańalyqqa qýanǵan el bıligi birer saǵattan soń Jańa Zelandııada búgin túnnen bastap barlyq shekteý sharalary alynatynyn habarlady. Degenmen el shekarasy áli de jabyq bolady. Erteńnen bastap ara qashyqtyq saqtaý men kóp adam jınalýǵa tyıym salǵan erejeler kúshin joıady.
Ýellıngton qalasynda ótken baspasóz maslıhatynda premer-mınıstr Djasında Ardern «Biz daıynbyz»,- dep málimdegen. Ol sondaı-aq Jańa Zelandııalyqtardyń vırýspen kúreste bildirgen yntymaqtyǵy men birligi úshin alǵys aıtty.
Jańa Zelandııa ózin koronavırýstan azatpyz dep jarııalaǵanymen, vırýsty anyqtaý sharalaryn toqtatpaıdy. Máselen, shekaradan ótken kez kelgen adam eki aptada boıy baqylaýda bolyp, odan osy aralyqta eki ret test alynady. Jalpy shekara qyzmetindegi barlyq adam testileýden ótýi kerek.
Djasında Ardern eldi jabý týraly sheshimdi naýqastar sany az bolǵanyna qaramastan 25 naýryzda qabyldady. Jańa Zelandııada barlyǵy 1 504 adam vırýs juqtyryp, 22 naýqas qaıtys boldy.