Almaty qalasynyń órtke qarsy qyzmetiniń tarıhyndaǵy eń iri órt oqıǵasy 1989 jyldyń 20 mamyrynda oryn alǵan. II Almaty temir jol stansasynyń kire beris joldarynda suıytylǵan gaz jáne jıhaz ben boıaý tıegen eki teplovoz soqtyǵysty.
О́rtti sóndirý jáne tótenshe jaǵdaı zardaptaryn joıýda 9 órt sóndirýshi qyzmettik mindetin oryndaý kezinde kóz jumdy. Osy oqıǵanyń oryn alǵanyna bıyl 31 jyl. Qaraly dataǵa oraı, Kókshetaý qalasyndaǵy tehnıkalyq ınstıtýtta oqý ornynyń basshylyǵy, ardagerler jáne jeke quramnyń qatysýymen qaza bolǵan órt sóndirýshilerdi eske alý keshi bolyp ótti. Is-sharaǵa Kókshetaý qalasy ákiminiń orynbasary Eldar Ábýev qatysyp, sóz sóıledi. Erligimen este qalǵan órt sóndirýshilerdi eske alý keshi bir mınýt únsizdikpen bastaldy.
Sharany ınstıtýt bastyǵy, azamattyq qorǵaý polkovnıgi Syrym Sháriphanov ashyp júrgizdi. Ol óz sózinde erliktiń eshqashan umytylmaıtynyn, óz qyzmetteriniń qaýipke toly ekendigin aıta kelip, jas mamandar úshin aldyńǵy tolqynnyń adal eńbegi, arly isi, táýekelge bel baılaýy óshpes ónege bolatynyna toqtaldy. Beıbit kúnniń batyrlaryn eske alyp, arýaqtaryna taǵzym ete otyryp, erlerge qurmet kórsetý keıinginiń paryzy ekendigine toqtala kele, bolashaqta óz ómirin osy mamandyqpen ushtastyrǵysy keletin jas mamandar úshin de óz isine sheksiz iltıpatpen qaraýdyń úlgisi bolyp qalatynyn atap ótti.
Sonymen qatar Ishki ister mınıstrliginiń qurmetti ardageri Saparǵalı Asylbekov te sóz sóılep, bolashaq qutqarýshylardyń óz isine adal bolýy, júktelgen mindetti abyroımen atqarýy kerektigin atap ótti.
KО́KShETAÝ