Qazaqstannyń ulttyq qurama komandasynyń kapıtany Talǵat Jaılaýov Joǵary hokkeı lıgasynda (JHL) óner kórsetetin Qaraǵandynyń «Saryarqa» klýbynyń jeıdesin kıdi, - habarlaıdy Egemen.kz.
1985 jyldyń 7 shildesinde О́skemende týyp-ósken Talǵat óziniń sporttyq karerasyn jergilikti "Torpedo" klýbynda bastady. Odan keıin astanaǵa attanyp, 11 maýsym boıy "Barystyń" namysyn qorǵady. Qurlyqtyq hokkeı lıgasynda (QHL) 418 ret muz aıdynyna shyqqan shabýylshy 75 gol soǵyp, 105 ret nátıjeli pas berdi. Barlyǵy – 180 upaı.
2007 jyly Jaılaýov elimizdiń eń úzdik hokkeıshisi dep tanylsa, 2014 jyly QHL-dyń "Juldyzdar matchynda" óner kórsetti. Qazaqstan quramasy sapynda qysqy Azııa oıyndarynyń jeńimpazy (2011 jyly) jáne kúmis júldegeri (2007 jyly) atandy. Dáp osy sportshy joǵaryda atalǵan qos jarystyń ashylý saltanatynda Qazaq eliniń kók baıraǵyn ustap shyǵý qurmetine bólendi.
Otandyq hokkeıdiń damýyna eleýli úles qosqan Talǵat Jaılaýovtyń "Baryspen" kelsimsharty 30 sáýirde aıaqtalǵan bolatyn. Al kúni keshe ǵana onyń "Saryarqaǵa" aýysqanyn qaraǵandylyq klýbtyń baspasóz qyzmeti rastady.