Túrkistan oblysy Ordabasy aýdanynda shaǵyn jáne orta bıznestiń damýyna erekshe mán berilýde. Bul oraıda aýdandyq kásipkerlerge qyzmet kórsetý ortalyǵy is bastaýǵa nıettilerge baǵyt-baǵdar berýde, - dep habarlaıdy Egemen.kz.
Mysaly, óz kásibin ıne - jipten bastaǵan aýdan turǵyny Aqnıet О́skenbaı áýeli úıinde otyryp, monshaq, bısserlermen basqa taǵatyn áshekeı buıymdar jasap, satýdan bastaǵan. Al memleket tarapynan kórsetilgen qoldaý ony yntalandyryp, jańa izdenisterge jeteledi. Búginde Aqnıettiń esimi aýyl-aımaqqa etene tanys. Isker kelinshekke qyz jasaýy, áshekeı buıymdar men balalardyń jórgegin tiktirýge tapsyrys berýshiler kóp. Súıikti isin ynta-yqylaspen isteıtin kásipker kelinshek memleketten 3 mln teńge kóleminde qaıtarymsyz grant utyp aldy. Sóıtip, kópfýnksııaly tigin mashınasyn satyp alyp, qazir jaınamaz syndy dinı buıymdar da tigýde. "Men negizi feldsher mamandyǵyn bitirgenmin, alaıda turmys quryp, balaly bolǵan soń, kúıeýim úıde otyrǵanymdy qalady. Sodan soń bul úıde otyryp bastaǵan kásibim bolatyn. Bastapqyda usaq jumystarmen, tutynýshylarmen jumys isteýdi úırendim. Memlekettik grantty utyp alyp, osy kásipti bastaǵannan keıin, kóptegen kisiler tiginshilikti úırenýge kele bastady", - deıdi kásipker.
Qazir Aqnıettiń "Rýmısa" dep atalatyn shaǵyn kásipkerlik nysanynda alty adam jumys isteıdi. Olar eńbegine qaraı aqy alady.