Senattyń Ekonomıkalyq saıasat, ınnovasııalyq damý jáne kásipkerlik komıtetiniń keńeıtilgen otyrysy ótti. Onda sıfrlyq tehnologııalardy retteý jáne tutynýshylardyń quqyqtaryn qorǵaý máselelerine qatysty zań jobalary qaraldy, - dep habarlady Senattyń baspasóz qyzmeti.
"Qazaqstan Respýblıkasynyń keıbir zańnamalyq aktilerine sıfrlyq tehnologııalardy retteý máseleleri boıynsha ózgerister men tolyqtyrýlar engizý týraly" zań jobasy Prezıdent Q.K. Toqaevtyń 2019 jylǵy 2 qyrkúıektegi Qazaqstan halqyna Joldaýyn iske asyrý maqsatynda ázirlengen.
Qujat sıfrlyq tehnologııalardy paıdalaný negizinde turǵyndarǵa qolaıly jaǵdaı jasaýǵa, azamattardyń jeke málimetteriniń qorǵalýyn qamtamasyz etýge jáne kúsheıtýge baǵyttalǵan. Osy maqsatta atalǵan salaǵa jaýapty ýákiletti organ anyqtalyp, onyń negizgi fýnksııalary belgilenedi.
Sonymen qatar atalǵan zań jobasynda aqparattyq-kommýnıkasııalyq ınfraqurylym salasyndaǵy jobalardy iske asyrýǵa jaǵdaı jasaý, ushqyssyz basqarylatyn ushý apparatyn qaýipsiz paıdalaný mehanızmderin aıqyndaý jáne elimizde robottardy qoldaný úlesin arttyrý qarastyrylǵan.
Otyrysta sentorlar "Qazaqstan Respýblıkasynyń keıbir zańnamalyq aktilerine tutynýshylardyń quqyqtaryn qorǵaý máseleleri boıynsha ózgerister men tolyqtyrýlar engizý týraly" zań jobasyn da talqylady.
Bul qujattyń negizgi maqsattary – tutynýshylardyń quqyqtaryn qorǵaý salasyndaǵy quqyqtyq qarym-qatynasty odan ári jetildirý, tutynýshylyq daýlardy sotqa deıin retteý ınstıtýtynyń rólin arttyrý, mártebesin kóterý, sondaı-aq bıznestiń tutynýshy aldyndaǵy áleýmettik jáne materıaldyq jaýapkershiligin arttyrý.
Qujat Qazaqstan Respýblıkasy Úkimetiniń janynan Tutynýshylardyń quqyqtaryn qorǵaý jónindegi vedomstvoaralyq keńes qurýǵa jáne osy salada Biryńǵaı aqparattyq júıe qalyptastyrýǵa múmkindik beredi.
Zań jobalary Palata qaraýyna joldandy.