Birer aı buryn Londondaǵy Halyqaralyq tennıs federasııasynyń (ITF) shtab-páterinde Devıs kýbogynyń fınaldyq kezeńiniń jerebesi tartylǵan edi. Bıyl 23-29 qarasha aralyǵynda Madrıdte jalaýy jelbireıtin aıtýly jarysta Qazaqstan quramasy Shvesııa jáne Kanada tennısshilerimen bir topta óner kórsetedi. Al sol qarsylastarymyz jaıynda biz ne bilemiz?
Pıreneı túbeginde ótetin aıtýly jarysta jerlesterimizge qarsylas atanǵan qos komanda arasyndaǵy qaýiptisi – Kanada. Qazirgi kezde Úıeńki japyraqtar eliniń tórt birdeı óreni «TOP-100» tennısshiniń qatarynda. Solardyń arasynda eń úzdigi – Denıs Shapovalov. Izraılde týyp-ósken ol balaýsa shaǵynda áke-sheshesimen birge Kanadaǵa qonys aýdardy. Bul kúnderi álemniń 16 raketkasy atanyp otyrǵan Shapovalovtyń eń úzdik kórsetkishi – 2017 jyly AQSh-tyń ashyq birinshiliginiń tórtinshi jáne 2019 jyly Aýstralııanyń ashyq birinshiliginiń úshinshi kezeńine deıin jetýi.
19 jastaǵy Felıks Alıassım Oge óziniń otandasy Denıs Shapovalovtan nebári tórt saty tómen tur. 19 jastaǵy Monreal qalasynyń týmasy byltyr Ýımbldon týrnıriniń úshinshi aınalymynda óner kórsetti. Basqa da halyqaralyq dodalarda ózin jaqsy qyrynan kórsetýde.
Búgingi tańda ATR reıtınginde 30 orynda turǵan 29 jastaǵy Mılosh Raonıch jaıynda uzaq áńgimeleýge bolady. Kezinde ol Ýımbldonnyń aqtyq synynda, Aýstralııanyń ashyq birinshiliginiń jartylaı fınalynda jáne Rolan Garrostyń shırek fınalynda kúsh synasty. AQSh-tyń ashyq birinshiliginde tórt márte tórtinshi kezeńge deıin jetti. ATR dodalarynda segiz ret jeńimpaz atandy. Osy tabysynyń arqasynda Raonıch 2016 jyldyń kúzinde álemniń úshinshi raketkasy atandy.
Veshek Pospıshıl Mılosh Raonıchpen túıdeı qurdas. Áıgili jerlesiniń jetken deńgeıine qol jetkize almaǵanymen, onyń da esimi jankúıerlerge jaqsy tanys. Vernon qalasynyń týmasy kezinde álemdik reıtıngte 25 orynǵa deıin kóterilgen. Ýımbldonnyń shırek fınalyna joldama aldy. Dál sol jarysty juptyq saıysta utty. Qazirgi kezde Pospıshıl úzdikter tiziminde 93 oryndy qanaǵat tutýda.
Devıs kýbogynda Kanada quramasy sonaý 1913 jyldan beri óner kórsetip keledi. Álemdik topta toǵyz ret baq synap, byltyrǵy jarystyń fınalynda kúsh synasý qurmetine ıe boldy. Aıtýly dodanyń shırek fınalynda Aýstralııa jáne jartylaı fınalda Reseı tennısshilerin utqan olar sheshýshi tusta azýy alty qarys Ispanııaǵa jol berdi.
1925 jyldan beri Devıs kýbogynda kúsh synasyp júrgen Shvesııa quramasynyń kezinde óreli ónerimen tórtkúl dúnıeniń tamsandyrǵany esimizde. Quramynda áıgili Born Borgteı marqasqasy bar Skandınavııa túbeginiń túlekteri 1975 jyly alǵash ret bas júldeni oljalady. Al shvedterdiń sekseninshi jyldardaǵy qarqyny, tipten keremet boldy. Atap aıtsaq, 1983-1989 jyldar aralyǵynda qatarynan jeti márte fınalda óner kórsetý quqyǵyna ıe boldy. Nátıjesinde, úsh týrnırde (1984, 1985, 1987) top jarsa, tórt ret (1983, 1986, 1988, 1989) aqtyq saıysta utyldy. Sol komandanyń sapynda Mats Vılander, Stefan Edberg, Ioakım Nıýstrem, Hans Sımonson, Iаn Gýnarsson jáne Anders Per Iаrrıd syndy sańlaqtardyń jasyndaı jarqyldaǵany da jankúıerlerdiń jadynda.
Toqsanynshy jyldar da shved tennısshileri úshin tolaǵaı tabysqa toly boldy. Olar 1994, 1997, 1999 jyldary Devıs kýbogyn tóbege kóterse, 1996 jyly fınalda ese jiberdi. Barlyǵy – jeti bas júlde jáne bes fınal. Atalǵan jarysta tabysy jaǵynan Shvesııa quramasy tórtinshi orynda tur. Olardyń aldyna AQSh, Aýstralııa, Fransııa jáne Ulybrıtanııa ǵana túse alǵan eken.
Jańa ǵasyr tabaldyryqtan attaǵannan keıin skandınavııalyqtardyń qarqyny báseńdep qaldy. Sońǵy ret olar álemdik topta 2012 jyly óner kórsetti. Sol jarystyń 1/8 fınalynda Serbııaǵa jol berdi. Sodan keıin biraz ýaqyt boıy myqtylar sanatyna qosyla almaı júrdi. Tek bıylǵy jarysta qaıta baǵy janyp, kózdegen maqsatyna qol jetkizdi.
Búgingi tańda Shvesııanyń tek bir ǵana ókili «TOP-100» tennısshiniń qatarynda. Ol – Mıkael Imer. 21 jastaǵy oıynshynyń ata-anasy efıopııalyq emıgranttar. Mıkaeldiń ózi Stokgolmde dúnıege keldi. Kezinde ol jasóspirimder arasyndaǵy Ýımbldon týrnıriniń fınalynda oınaǵan. Eresekter dýyndaǵy eń jaqsy nátıjesi – 2019 jylǵy Rolan Garros jáne 2020 jylǵy Aýstralııanyń ashyq birinshiliginiń ekinshi kezeńine joldama alý. ATR reıtınginde Imer 68 oryndy ıelenýde.
Mıkaeldiń týǵan aǵasy – 23 jastaǵy Elıas Imer úzdikter tiziminde 209 oryndy enshileýde. Al ózge oıynshylardyń reıtıngteri tipten tómen. Máselen, bul kúnderi túrli jarystarda Shvesııanyń namysyn qorǵap júrgen Markýs Erıksson ATR tiziminde 316 satyǵa jaıǵassa, Krıstıan Lındell 324 oryndy qanaǵat tutýda.
Mine, ústimizdegi jyldyń kúzinde Ispanııanyń astanasy – Madrıdte ótetin Devıs kýbogy jolyndaǵy jarysta Qazaqstannyń tennısshilerine qarsylas atanǵan Kanada men Shvesııa quramalary jaıynda qysqasha málimet osyndaı.
Jýyrda ǵana Nıderland quramasyn utyp, myqtylarmen kúsh synasý qurmetine ıe bolǵan Qazaqstannyń tennısshileri V tobyna tústi. Jerlesterimiz Shvesııa jáne Kanadanyń oıynshylarymen sheberlik baıqasady. Al ózge toptarda myna komandalar óner kórsetedi:
A toby: Ispanııa, Reseı, Ekvador;
S toby: Fransııa, Ulybrıtanııa, Chehııa;
D toby: Horvatııa, Aýstralııa, Majarstan;
E toby: AQSh, Italııa, Kolýmbııa;
F toby: Serbııa, Germanııa, Aýstrııa.
Devıs kýbogynyń fınaldyq kezeńi ústimizdegi jyldyń 23-29 qarashasy aralyǵynda Ispanııanyń bas shahary – Madrıdte ótedi.