Qazaqstannyń Mońǵolııadaǵy Elshiliginiń usynysymen, mońǵol tarapynyń qoldaýymen búgin tańertengi saǵat 8.00-de Ulan-Batyr – Nur-Sultan baǵyty boıynsha "MIAT" Mońǵolııanyń memlekettik áýe kompanııasynyń arnaıy charterlik reısi uıymdastyryldy. Osy ushaqpen Qazaqstannyń 96 azamaty elge qaıtaryldy, - dep habarlaıdy Egemen.kz.
Olar Mońǵolııaǵa Qazaqstannan karantın engizilip, mońǵol-reseı shekarasy jabylǵanǵa deıin jeke saparmen kelip (jerleý rásimine qatysý, emdelý, jeke isterimen jáne týǵan-týysqandaryna kelý), osy elde qalýǵa májbúr bolǵan azamattar.
Elshilik Qazaqstan azamattaryn elge qaıtarý maqsatynda olarǵa birqatar qoldaý kórsetti. Eń bastysy atalǵan azamattardyń mıgrasııalyq tirkeýlerin uzartý máselesin ońtaılandyrdy. Bunyń ózi Mońǵolııada 3-4 aı qalýǵa májbúr bolǵan azamattar úshin qarjylyq jaǵynan úlken kómek bolǵanyn atap ótken jón.
Qýat ÝATHAN,
Mońǵolııadan