Qazaqstandyqtardyń qujattary sıfrlandyrylady. Bul týraly Sıfrlyq damý, ınnovasııalar jáne aeroǵarysh ónerkásibi mınıstri Asqar Jumaǵalıev Ortalyq kommýnıkasııalar qyzmetinde ótken halyq aldynda esep berý kezdesýinde aıtty, - dep habarlaıdy Egemen.kz.
"Qazaqstandyqtar endi kerek qujatyn alý úshin Halyqqa qyzmet kórsetý ortalyqtaryna baryp sabylmaıdy. Búginde qyzmettiń 82 paıyzy avtomattandyrylǵan. О́tken jyly 54 mln qyzmet onlaın jasalǵan", - dedi Asqar Jumaǵalıev.
Mınıstrdiń aıtýynsha, elde tótenshe jaǵdaı bastalǵaly 17 mıllıonnan astam memlekettik qyzmet elektrondy túrde jasalǵan. Kúndelikti alýǵa bolatyn qujattar sany 3 ese kóbeıgen.
"Qazir kez kelgen qazaqstandyqtyń qolynda smartfon baryn eskere otyryp, ótken jyly arnaıy mobıldi qosymsha ázirledik. Bul turǵyndar úshin óte qolaıly. Búginde onyń 1 mln-nan asa qoldanýshysy bar. Birneshe batyrmany basa otyryp kerek qujatyńyzdy onlaın ala alady", - dedi ol.
Mobıldi qosymshada azamattyń elektrondy tólqujaty, týý týraly kýáligi jáne neke qııý týraly kýáligi syndy qujattardy saqtaýǵa bolady. "Sıfrly tehnologııalar týraly" jańa zańǵa sáıkes, elektrondy qujat pen túpnusqa qujattyń kúshi birdeı.
"Búgin ǵana Senat otyrysynda atalǵan zań jobasy qaraldy. Jańa zań azamattardyń ózimen birge birneshe qujat alyp júrmeı, ony sıfrlandyrýǵa múmkindik beredi", - dedi ol.