Aqmola oblysy Ereımentaý aýdanynda ornalasqan Kóbeıtuz kóli emdik qasıetimen paıdaly. Ári osy aýdandaǵy iri kólderdiń biri. Byltyr, oıda joqta, Kóbeıtuz kóli kópshiliktiń nazaryn aýdardy. Sol-aq eken, kóldi izdep, jolǵa shyqqandar kóbeıe bastapty. Nege deısiz ǵoı?
2019 jyldyń jazynda tuzdy kóldiń túsi qyzǵylt reńge boıala bastaǵan. Bireýdiń ádeıi jasaǵan isi emes. Tuz qabyrshaqtary qyzaryp, kóldiń beti erekshe qubylysqa engen. Sondyqtan bolar, Kóbeıtuz – Qyzǵylt kól atalyp keledi. Kóktegi aqsha bulttar da kól ústinde kólbeńdep ádemi úılesim tapqan. Mundaǵy ásemdikke tamsanyp, tuzdy sýdan shıpa izdep keletin adamdar kúnnen kúnge kóbeıip kele jatyr. Máselen, Janerke Erbosynqyzy ótken aptada ǵana atalǵan jerge arnaıy baryp qaıtypty.
- Alǵashqyda kólge barǵan adamdardyń foto-vıdeolaryn kórip, qyzyqtym. Kóp uzamaı jolǵa shyqtyq. Elordadan asa alys ta emes. Kól Nur-Sultan-Pavlodar tas jolynyń boıynda jatyr eken. Ereımentaýdan ótken bette «Qorjynkól stansııasy» degen belgiden ońǵa burylǵan soń, týnnel arqyly joldyń arǵy betinde ornalasqan «Aqjol» keshenine jettik. Kól sol mańaıda. Ol jerdegi kórinisti sózben aıtyp jetkize almaımyn. Tek kózben kórý kerek. Men barǵanda adamdar kóp júrdi. Jalań aıaq sý keshken ata-ájeler de baıqalady. Jaǵasynda dastarhan jaıyp, kóńildi otyrys quryp otyrǵan otbasylar da bar. Sonyń bári adamǵa erekshe atmosfera syılaıdy, - deıdi boıjetken.
Osy tektes pikirlerdi áleýmettik jelidegi oqyrmandardyń jazbasynan da jıi baıqaımyz. Sondyqtan da Aqmola oblysynyń týrıstik áleýetin arttyrýǵa tıimdi oryndardyń biri bolýǵa laıyq degen oı keledi. Aldymen alystan at terletip keletin saıahatshylar úshin tıisti jaǵdaılar jasalýy shart. Bul – ishki týrızmdi jandandyrýdaǵy eleýli jumys bolar edi dep oılaımyz.