Úndistanda bir táýlikte 11,5 myń adamnyń koronavırýs juqtyrǵany belgili boldy, - dep habarlaıdy Egemen.kz.
Johns Hopkins University málimeti boıynsha, Úndistanda vırýs juqtyrǵandardyń jalpy sany 332 424-ke jetti. Osylaısha bul el vırýs juqtyrǵandar sany kóp álemdegi tórtinshi elge aınaldy. Qazir munda 153 106 adam em qabyldap jatyr. 169 797 adam indetten aıyqty, 9520 naýqas kóz jumdy.
Naýqastardyń kópshiligi el ortalyǵyndaǵy Maharashtra shtatynda tirkelýde. Onda aýrýdyń barlyq jaǵdaılarynyń úshten bir bóligi, 107 858 naýqas tirkelgen.
Buǵan deıin el bıligi vırýs juqtyrǵandar sany az jerlerde karantın rejımi birtindep jeńildetiletinin aıtqan edi. Osylaısha 8 maýsymda keı jerlerde ǵıbadathanalar, qonaq úıler, meıramhanalar men saýda ortalyqtarynyń qaıta jumys isteýine ruqsat berildi. Al naýqas sany kóbeıip kele jatqan mekenderde karantın rejımi 30 maýsymǵa deıin uzartyldy.
DDU málimetine sáıkes, álemde koronavırýs juqtyrǵandar sany 8 mıllıonǵa jýyqtady, 433 myńnan astam adam qaıtys boldy.