Túrkistan oblysynda polıseıler saqtandyrý tólemderimen alaıaqtyq jasaǵan kúdiktini qolǵa túsirdi, dep habarlady IIM baspasóz qyzmeti.
Saıram APB-nyń kezekshi bólimine jergilikti turǵyn aryzdanyp, alaıaqtyq jolmen beıtanys adam onyń úlken kólemdegi aqshasyn tartyp alǵanyn jetkizdi. Jábirlenýshi áıeldiń aıtýynsha, alaıaq onyń senimine kirip, jol-kólik oqıǵasynan qaza tapqan kúıeýiniń saqtandyrý tólemderin alý úshin kómek kórsetemin dep aldaǵan. Sodan alaıaq er adam óziniń atyna saqtandyrý senimhatyn resimdeýge jesir áıeldi kóndirip, óz shotyna aqsha túsken soń ony jymqyryp, oqıǵa ornynan boı tasalaǵan.
Jábirlenýshige keltirilgen shyǵyn kólemi 5 mln teńgeden asty. Osyǵan uqsas aryzdarmen polısııa basqarmasyna taǵy birneshe jábirlenýshi kelip, kómek suraǵan. Atalǵan jaıttar QR QK 190-baby (alaıaqtyq” boıynsha Saıram aýdandyq PB-da tirkeldi.
Qylmysty ashý maqsatynda Saıram aýdandyq polısııa basqarmasynda tájirıbeli qyzmetkerlerden jedel-tergeý toby quryldy. Jedel-izdestirý is-sharalarynyń qorytyndysyna sáıkes polısııa qyzmetkerleri kúdiktini jasyrynyp júrgen jerinen Almaty qalasynan ustady. Ol Shymkent qalasynyń turǵyny bolyp shyqty.
Búgingi tańda tergeý barysynda kúdiktiniń jalpy somasy 18 mıllıon teńgeden astam tórt alaıaqtyq deregine qatystylyǵy anyqtaldy. Belgili bolǵandaı, er adam bir jospar boıynsha áreket etip, jábirlenýshilerdiń senimine kirip, jesirlerine saqtandyrý tólemderin alýǵa kómektesýge ýáde berip, qujattaryn resimdegennen keıin óz shotyna aqsha aýdartyp, jasyrynyp júrgen.
Qazirgi ýaqytta alaıaqtyq jaıttary boıynsha sotqa deıingi tergeý amaldary júrgizilip jatyr. Kúdikti qamaýǵa alyndy. Polısııa qyzmetkerlerimen kúdiktiniń basqa da alaıaqtyqqa qatystylyǵy anyqtalady.
Túrkistan oblysynyń polıseıleri turǵyndarǵa kúmándi qyzmetterdi usynatyn beıtanys adamdarǵa senbeýge keńes beredi. Sondaı-aq, qandaı da bir mámilelerdi resimdeý jáne qujattardy resimdeý kezinde muqııat bolý kerek. Eger siz alaıaqtyqtyń qurbany nemese kýágeri bolsańyz, shuǵyl “102” telefony arqyly polısııaǵa habarlasyńyz.