Jýyrda Rıo Olımpıadasynyń chempıony Nıjat Rahımov bastaǵan bir top qazaqstandyq aýyr atletter federasııaǵa renishin aıtyp, áleýmettik jelide jyl basynan beri jalaqy ala almaı kele jatqanyn málimdegen edi.
Atap aıtar bolsaq, olardyń ishinde Nıjat Rahımovtan bólek, Rıo Olımpıadasynyń qola júldegerleri Karına Gorıcheva men Denıs Ýlanov, 2019 jylǵy álem chempıonatynyń kúmis medal ıegeri Igor Son, elishilik jáne halyqaralyq dodalarda úzdikter qatarynan kórinip júrgen Ibragım Bersanov, Aıdar Qazov pen Rústem Sybaı bar. Osy máselege Sport jáne dene- shynyqtyrý isteri komıteti pikir bildirip, atletter daýlaǵan qarjy jalaqy emes demeýshiler tarapynan beriletin qosymsha syıaqy ekenin aıtty. Al Ulttyq Olımpıada komıteti tarapynan sportshylarǵa turaqty jalaqy berilip kelgeni belgili boldy.
Mysaly, 2020 jyldyń 1 qańtar men 31 mamyr aralyǵynda Nıjat Rahımov – 4 250 000 teńge (orta eseppen aılyq jalaqysy 850 myń teńge), Denıs Ýlanov – 2 250 000 teńge (aıyna 450 myń teńge), Igor Son – 1 250 000 teńge (aıyna 250 myń teńge), Karına Gorıcheva – 1 000 000 teńge (aıyna 200 myń teńge), Ibragım Bersanov – 823 868 teńge (aıyna 164 773 teńge), Aıdar Qazov – 795 701 teńge (aıyna 159 140 teńge), Rústem Sybaı – 778 801 teńge (aıyna 155 760 teńge) jalaqy alǵan.