Jeksenbide Tóle bı aýdany, Birgólik aýylynan 5 shaqyrym jerde ornalasqan "Birgólik" demalys aımaǵynda 22 oqýshy men 3 eresek adam taý bókterine demalýǵa shyqqan, - dep habarlaıdy Egemen.kz.
Toǵyz oqýshy men tárbıeshi taýǵa kúndiz shyǵypty. Olardyń altaýy men tárbıeshi óz betimen tómenge túsken, al 3 oqýshy adasyp ketken.
Ishki ister mınıstrligi Tótenshe jaǵdaılar komıtetiniń habarlaýynsha, tárbıeshi taýdan túskennen keıin saǵat 22:48-de "112" nómirine habarlasqan. Saǵat 23:00-den bastap Shymkent qalasynyń Tótenshe jaǵdaılar departamenti Jedel-qutqarý jasaǵynyń (6 qyzmetker men 1 tehnıka), Túrkistan oblysynyń TJD (10 qyzmetker men 3 tehnıka), jedel medısınalyq járdem brıgadasy (5 qyzmetker men 1 tehnıka), polısııa bólimi (2 adam men 1 tehnıka) kúshteri izdestirý-qutqarý jumystaryn júrgizdi. О́kinishke qaraı, jeksenbiden dúısenbige qaraǵan tún jarymda, ıaǵnı 00:58-de Shymkent qalasynyń TJD-nyń izdestirý toby jardan qulap ketken 2003 jyly týǵan jasóspirimniń óli denesin taýyp, jerge túsirdi. Al eki oqýshymen túske jaqyn habarlasýǵa múmkindik týǵan. Qutqarýshylardyń aıtýynsha, olarmen uıaly telefonmen baılanys bar.
"Shymkent qalasy TJD JQJ qutqarýshylary alpınıstik qural-jabdyqtardy qoldana otyryp, balalardy túsirý jáne qutqarý boıynsha operasııa júrgizýde. Alaıda, jartasty jerler, bıik taýlar men tik betkeılerge baılanysty qutqarý jumystary qıyndaı túsýde. Qutqarý operasııasynyń qorytyndysy týraly qosymsha habarlanady", - delingen IIM TJK habarlamasynda.
Túrkistan oblysy