Qazaqstan fýtbolynda buryn-sońdy bolmaǵan oqıǵa oryn aldy. Qaraǵandyda jergilikti «Shahter» men Shymkenttiń «Ordabasy» komandasynyń oıynynan keıin qonaqtardyń bas jattyqtyrýshysy Vıktor Pasýlko óziniń attas áriptesine qatysty biraz áńgimeniń basyn burqyratty. Onyń negizgi mazmuny matchtan keıin Kýmykov buǵan ádeıi kelip turyp, qol jumsaǵan degenge saıady. Al matchtyń 3:0 esebimen alań ıeleriniń paıdasyna sheshilgeni málim. Eger qaraǵandylyqtardyń bas bapkerin tyńdasaq, ol kezdesýden keıin meımandar mingen avtobýsqa arnaıy kirip shyqqanyn joqqa shyǵarmaıdy. Sonda biri Reseıdiń, ekinshisi Ýkraınanyń ókili bolyp tabylatyn eki jattyqtyrýshyǵa ne jetpeı júr? Nege olar qyrylyp tóbelesken?
Munyń jaıyn osy oqıǵaǵa qatysty eki jaq eki túrli baıandap beredi.
Vıktor Pasýlko, «Ordabasy» klýbynyń bas jattyqtyrýshysy:
-Bul oqıǵa qonaqtarǵa berilgen avtobýstyń ishinde boldy. Is júzinde biz stadıonnan ketip bara jatyr edik. Ol salonǵa kire salyp: «Sen, Pasýlko, endigári meniń komandam týraly osyndaı sóz aıtatyn bolsań..», - dedi de, eki judyryǵyn birdeı ala júgirdi. Boraǵan boqtyq sózder de ketti. Maǵan qorǵanýǵa týra keldi. Men tipti onyń tura umtylǵan sátin de baıqamaı qalyp, ekinshi oryndyqqa qaraı syrǵyp tústim. Sol kezde jigitterim kelip, arashalap alyp qaldy.
О́zin jábirlenýshi sanaǵan Vıktor Pasýlko sol boıda Qazaqstan Fýtbol federasııasyna shaǵym túsirdi. Ol munda Vıktor Kýmykovtyń ózinen kópshilik aldynda keshirim suraýyn talap etipti. Biraq sol sátte Kýmykov jumystarymen shet elge ketip qalǵan bolyp shyqty. Soǵan qaramastan, ol óziniń uıalatyndaı eshteńe jasamaǵanyn aıtyp úlgerdi.
Qazir mamandar bul eki jattyqtyrýshynyń arasy burynnan jaqsy emes ekenin aıtyp otyr. Erteden kele jatqan sol qyjyl bir-aq sátte burq etip kóterile ketken sııaqty. Bul matchtan keıingi baspasóz máslıhatynda da aıqyn ańǵarylǵan. Olar osy sharanyń ózine birge kelmepti. «Ordabasynyń» bas jattyqtyrýshysy sol jerde otyrǵanda da onshalyqty bir ymyrashyldyq kórsete qoımaǵan kórinedi. Bul onyń myna málimdemelerinen de baıqalady.
Vıktor Pasýlko, «Ordabasy» klýbynyń bas jattyqtyrýshysy:
-Búgingi jeńis «Shahterdiń» eńbek sińirýimen kelgen joq. Bul komanda fýtbol oınaı almaıdy. Meniń kózqarasymsha, komanda týra antıfýtbol oınaıdy. Túsindińizder me? Komandaǵa jurtqa unaıtyn fýtbol oınaýdy sińirý kerek. Anadaı pastar, dop berý, aýttan laqtyrý emes keregi. Búgin osylardyń bári de boldy. Buǵan qosa, tóreshi jaqtasyp otyrsa, árıne, chempıon da bolyp ketersiń.
Jasyratyny joq, Pasýlkonyń mynadaı «pasynan» keıin Kýmykovtyń shydap tura almaǵanyn da túsinýge bolady. Qansha degenmen kavkazdyq qany bar kabardın jigiti osydan keıin ashynyp ketken sııaqty. Biraq ol erejeden tys ketip qalmaǵanyn da aıtyp jatyr. Endi sony tyńdaıyq.
Vıktor Kýmykov, «Shahter» komandasynyń bas jattyqtyrýshysy:
-Qaıdaǵy qol jumsaǵan? Eger men muny jasaǵan bolsam, ol qazir bulaısha jurtpen sóılesip otyra almas edi. Pasýlko shybynnan pildi kóretin adam. Bálkim, ol komandasynyń qatarynan tórtinshi ret jeńilip qalǵanyn jabý úshin jurt nazaryn osylaı qaraı aýdaryp jibergisi kelgen shyǵar. Men solaı oılaımyn. Bul, shamasy, onyń jańa fınti bolsa kerek.
Chempıonattyń aıaqtalýyna 2 týr ǵana qalǵan qazirgi shaqta «Shahter» týrnır kestesiniń tórtinshi ornynda keledi. Al «Ordabasy» odan eki saty tómende. Bul eki klýb Qazaqstan chempıonatynda osy kezge deıin bir-birimen 32 ret kezdesip úlgeripti. Sonyń 15-inde qaraǵandylyqtar jeńse, 8 oıynda shymkenttikter basym bolǵan. Jáne árbir jeńilis saıyn shymkenttikter bapkeri alańdaǵy tóreshiniń ústinen shaǵym aıtyp otyrǵan.
Al myna daýdyń nemen aıaqtalatyny ázirge belgisiz. Buryn-sońdy bolmaǵan bul janjaln Qazaqstan fýtbol federasııasy da aıryqsha alańdatyp otyrǵanǵa uqsaıdy. Federasııanyń baspasóz hatshysy Izmaıl Bzarovtyń aıtýynsha, eki jaqqa da jaǵdaıdy túsindirip jazý týraly hat jiberilgen. Al másele jaqyn aralyqta bolatyn federasııanyń baqylaý-tártip komıssııasynda qaranıy aralmaqshy.
Biz onyń qorytyndysy jaıly kezinde habarlaımyz.
Rýslan Igilik.