Kompanııanyń qoǵammen baılanys qyzmetiniń habarlaýynsha, maýsymǵa deıin "Embimunaıgaz" AQ-da 3 jumysshydan qaýipti indet jumysqa shyǵar aldyndaǵy mindetti skrınıngten ótý kezinde anyqtalypty, - dep jazady Egemen.kz
"Maýsymnyń basynan beri Jylyoı aýdanyndaǵy Tereń-О́zek, Qısymbaı, Qyzylqoǵa aýdanyndaǵy Kenbaı ken oryndarynda "Embimunaıgazdyń" 62 jáne merdiger kompanııalardyń 55 qyzmetkerinde COVID-19 anyqtaldy. Buǵan qosa, mindetti skrınıng kezinde "Embimunaıgazdyń" 19 jumysshysynan vırýs juqtyrý jaǵdaıy tirkeldi. Barlyq jumysshylar qajetti em alý úshin Qulsary jáne Atyraý qalalaryndaǵy juqpaly aýrýlar aýrýhanalaryna jatqyzyldy. Sımptomsyz aýyryp jatqan jumysshylar otbasynyń ózge múshelerinen oqshaýlanyp, úı karantınine ornalastyryldy. Al, úıde oqshaýlaý talaptaryn saqtaýǵa múmkindigi joq adamdar Atyraý qalasynyń Bereke yqsham aýdanyndaǵy arnaıy jabdyqtalǵan úılerge karantınge jatqyzyldy. PTR testteri teris nátıje kórsetken jumysshylar jumys oryndarynda baqylaýǵa alyndy"-dep habarlady kompanııanyń qoǵammen baılanys qyzmeti.
Qazir "Jylyoımunaıgaz", "Qaınarmunaıgaz" basqarmalarynyń, sondaı-aq, atalǵan óndiristik bólimshelerde jumys isteıtin "Embimunaıenergo" basqarmasynyń qyzmetkerleri úshin jumys vahtasynyń merzimi 14-ten 28 kúnge deıin uzartylyp otyr. Vahtalyq jumysqa jiberiletin "Embimunaıgazdyń" jáne merdiger mekemelerdiń barlyq jumysshysy PTR-testten keıin vırýs juqtyrýdy boldyrmaý maqsatynda 5 kúndik karantınge jatqyzylady. Qaýipsizdikti qamtamasyz etý maqsatynda ortalyq apparattyń bir bóligi qashyqtan jumys isteý rejımine kóshirildi. Al, qyzmetkerlerdiń bas keńse ǵımaratynda bolý ýaqyty túski úzilissiz saǵat 15.00-ge deıin qysqartyldy.