Búgin, 8 qazan kúni Astananyń «Barysy» Podolskiniń «Vıtıazin» qabyldap, 3:1 esebimen jeńdi. Oıynnyń negizgi ýaqyty 2:2 esebimen teń aıaqtalyp, matchtan keıingi býllıtte astanalyqtar basym tústi.Bul týraly Egemennews.kz tilshisi habarlady.
Býllıt arqyly bolǵan osy jeńistiń ózi astanalyqtardyń kóshbasylyq ornynyń saqtalyp qalýyna múmkindik berdi. Bizdiń jerlesterimiz oıyn bastalǵannan onyń tizginin óz qolyna aldy. Biraq ony júzege asyrýdyń oraıyn keltire almaı jatty. Birinshi kezeńde eki jaq ta aqyry esep asha almaı tarqasty. «Barys» ekinshi kezeńde de basymdyq kórsetti. Komanda onyń nátıjesin tek 31-mınýtta ǵana kórsetti. Forvard Evgenıı Blohın áriptesteri Maksım Semenovpen jáne Talǵat Jaılaýovpen (sýrette) birer ret shaıba almasyp alǵasyn, qaqpashy Ivan Lısýtın qorǵaǵan qaqpany alys buryshynan sańylaý taýyp úlgerdi. Alaıda, qonaqtar da qarap qalmady. Olar arany kópke sozbaı, alańda kóp bolǵan kezderin sátti paıdalanyp, esepti teńestirip ketti. Muny alań ıeleriniń golkıperi Arı Ahonendi qapy qaldyrǵan Iаkov Seleznev jasady.
Úshinshi kezeńde Sergeı Topol qonaqtardy alǵa shyǵardy. Al «Barys» bul goldyń jaýabyn aıdynda kópshilik bolyp júrgen kezinde ǵana bere aldy. Sol kezde olardyń bes oıynshysy podolskilikterdiń úsh oıynshysyna qarsy oınap júr edi. Sonymen, esep 2:2-ge turaqtady.
Qalǵan ýaqytta da, odan keıingi overtaımda da qarsylastar bir-birlerinen asqan joq. Sosyn hokkeı «penaltıi» - býllıtke kezek berildi. Onda jeńis soqqysyn Roman Starchenko jasady.
Qazir «Barystyń» qorjynynda 29 upaı bar. Ekinshi bolyp kele jatqan Qazannyń «Aq Barysy» 28 upaımen tur. Aıta ketý kerek, Shyǵys konferensııasynda top basyna talasýshy negizgi qarsylastar bolyp kele jatqan bul ekeýdiń oıyndary sany eki túrli. Aıtalyq, qazandyqtar qazirge deıin 14 oıyn oınap qoıdy. Al astanalyqtardyń budan eki oıyny kem.
«Barys» kelesi oıynyn 10 qazan kúni óz alańynda Máskeýdiń «Dınamosymen» ótkizedi. Match Astana ýaqytymen saǵat 19:00- de bastalady.
Damır Qojamqul.