Reseılik ASA promoýsheni shilde aıynda aralas jekpe-jekten eki birdeı dúbirli doda uıymdastyrýdy kózdep otyr. Ázirge bul jarystardyń qaı elde jáne qaı qala ótetini belgisiz. Bizdiń biletinimiz, aıtýly týrnırde Qazaqstannyń úsh birdeı óreni óner kórsetedi, - dep habarlaıdy Egemen.kz.
14 shildede ótetin ASA 106 týrnıriniń negizgi jekpe-jekteriniń birinde Qazaqstannyń týy astynda 31 jastaǵy tanymal sportshy Georgıı Kıchıgın óner kórsetedi. 77 kılo salmaqta kúsh synasyp júrgen ol osy kúnge deıin 29 kezdesý ótkizip, 23 ret jeńiske jetti. 20 básekede aıqyn basymdyq tanytty. Jerlesimiz reseılik Magomedsaıgıd Álibekovpen aıqasady. Daǵystannyń túlegi 11 kezdesýdiń tek bireýinde ǵana utyldy.
Al 24 shildede jalaýy jelbireıtin jarysta Qazaqstannyń qos qyrany kúsh synasady. Olar – Qarshyǵa Daýytbek pen Evgenıı Egemberdıev. Ekeýi de Danııar Qasqaraýov jetekshilik etetin "Alash Praıd" klýbynyń ókilderi. 66 kılo salmaqtaǵy Qarshyǵa Daýytbek cheshenstandyq Hasseın Shaıhaevpen sheberlik baıqasady. Qandasymyz 12 kezdesýdiń 9-ynda ústemdik tanytsa, qarsylasy úsh básekeniń barlyǵyn óz paıdasyna sheshti.
93 kılo salmaqtaǵy Evgenıı Egemberdıev oktogonda 13 jekpe-jek ótkizip, ekeýinde ǵana ese jiberdi. Qazirgi kezde ol ASA reıtınginde tórtinshi orynda tur. Otandastarymzdyń arasyndaǵy bul eń úzdik kórsetkish. Evgenıı daǵystandyq Nasrýdın Nasrýdınovpen aıqasady. Ol 8 básekeniń barlyǵynda qarsylastarynyń osal tusyn tapty.
Taǵy bir aıta keterlik jaıt, Qazaqstannyń qos ókili óner kórsetetin týrnırdiń basty jekpe-jeginde atyshýly Aleksandr Emelıanenko men Magomed Ismaılov judyryqtasady. Bul sportshylardyń ekeýiniń de ataǵy alysqa jaıylǵan. Taıaý kúnderi 39 jasqa tolǵaly otyrǵan Emelıanenko kezinde Japonııanyń "Praıd" promoýsheninde eleýli tabystarǵa qol jetkizdi. Kezinde ol Pavel Nastýla, Djeıms Tompson, Sergeı Harıtonov, Bob Sapp, Gabrıel Gonzaga syndy sańlaqtarǵa san soqtyrdy. Barlyǵy 36 kezdesý ótkizgen reseılik sportshy 28 ret jeńis toıyn toılady. 7 ret jeńilip, taǵy bir tartys teń eseppen aıaqtaldy. Aleksandr dańqty Fedor Emelıanenkonyń týǵan inisi.
34 jastaǵy Magomed Ismaılov Reseıdiń Tómengi Tagıl qalasynda dúnıege kelgenimen, balaýsa kezinde atan-anasymen birge Mahachkalaǵa qonys aýdardy. Ulty – avar. Daǵsytanda júrip, jekpe-jek óneriniń san túrin meńgerdi. Ol 18 ret aıqas alańyna shyǵyp, sol saıystardyń ekeýinde ǵana jeńilistiń kermek dámin tatty.